admin
Cornelius Luphahla
KULENDODA yelokitshini leCowdray Park ezahlala ifunga igomela ukuthi ngeke iphinde itshontshe kulandela ukuwa idabuke ikhanda okubangele ukuthi iqaleke izama ukutshontsha i-satellite dish kamakhelwane wayo, uMthunywa ukuzwile lokhu.
Isiga lesi senzakale ngoLwesine kuviki ephelileyo lapho uLayton Moyo awe khona phezulu kophahla lukaMnumzana Shepherd Ndlovu wadabuka ikhanda okubangele ukuthi aqaleke waze wathwalelwa esibhedlela.
Esinye isakhamuzi sakule indawo esiziveze ngokuthi nguDube sithe uMoyo engabe wafuqwa yizinto zikaNdlovu emazengeni.
“Indawo yonke le kuyaziwa ukuthi uNdlovu ulabondofa njalo akutshontshwa endlini yakhe. Ngikhuluma nje uMoyo ngowesithathu ukuwa phezulu kwendlu kaNdlovu etshontsha. Lokhu kuveza sobala ukuthi kungabe kulezinto ezibawisayo,” kutsho uMnu Dube.
Intatheli ikhulumisane loMnu Ndlovu wathi wayelele ebusuku wezwa umsindo phezulu kwendlu wathi evula umnyango wezwa sokungumkhosi phandle wathola kulisela selilimele kodwa kakwazi ukuthi lawiswa yini njalo kalandofa.
“Mina ngangilele endlini yami kuphakathi kobusuku ngezwa kulomsindo phezulu kwendlu ngavuka ngifuna ukuyabona ukuthi kulani. Ngithe ngivula umnyango ngezwa umuntu sehlaba umkhosi phandle ngagijima ngathola kunguMoyo sedabuke ikhanda. Ngambuza ukuthi kwenze njani wathi uyaxolisa ubezama ukutshontsha wasesiwa.
“Kwangidanisa lokhu ngoba uMoyo ngumntakamakhelwane wami njalo ngangingamcabangeli ukuthi engaba lisela. Ngemva kwalokho ngavusa uyise samthwala samusa esibhedlela okuyikho asilele khona. Isimanga yikuthi abantu sebesithi ngilezinto ezamtshayayo yikho wawa khonapho bengiqambela amanga,” kulandisa uMnu Ndlovu.
UMoyo ebuzwa ngale indaba uvumile ukuthi yenzakala wathi kakwazi ukuthi wayengenwe yini aze ayetshontsha komakhelwane njalo kakuphindi.
“Mina kangikwazi ukuthi ngize ngiyelimala komakhelwane ngizama ukuthatha i-satellite dish kwakuhambe njani njalo kangifi ngakuphinda. Ngemva kokwehlelwa yisilingo lesi ngimxolisile uNdlovu njalo lokhu ngimxolisa ngoba ngamphambanisa kakhulu.
“Ngalokhu ngizazama ukumbonga sibili ngoba kazange wangibophisa njalo lakhathesi lokhu engiphatha njengomntanakhe, uyabuya ezongibona njengoba ngingakasili. Ukuthi ngawa njani kangibonanga njalo kangizange ngezwa isivalo sivuleka ngalesosikhathi ngabona uNdlovu sefikile kuphela,” kuphetha uMoyo.
Online Reporter