admin
Ncekwenhle Ncube
ZIBUKELE ibhayisikopo yamahala izakhamizi zeBeitbridge kuviki esanda kwedlula kulandela ukuba elinye inina libhaxabule owesifazane elimthole embhedeni encinda uluju lwemvelo lomkakhe.
Kubikwa inina leli lasuka lisiya ezitolo ezibucwadlana lomuzi walo lingazi ukuba umyeni walo wayesethole ithuba lokunyenyisa umakhwapheni wakhe endlini.
Iphephandaba likazulu lilevidiyo yenina leli elingasatholakalanga igama lalo libhaxabula umakhwapheni lo ebaleka ebhunyumunyu.
Kuzwakale ukuthi wathi efika endlini wahle waqonda endlini yokulala lapho afica umkakhe lomakhwapheni lo abonakala emtshaya ngogodo bezincindela uluju lwemvelo.
Omunye umfakazi oqotho uchaze ukuthi indoda yathi ibona umkayo yacela ezinyaweni kwathi umakhwapheni wabanjwa ngumjibila.
Kuvidiyo le esabalaliswe ku-WhatsApp inina leli likhanya litshaya umakhwapheni lo esuka endlini yokulala aze ayephuma laye intuba yomuzi.
UMthunywa uzwe ukuba umakhelwane wenina leli uthe wezwa umkhosi wagijima eqonda kule indlu wafica inina leli lizonde ligane unwabu lifuqa umakhwapheni lo ngapha liphethe limtshaya.
“Ngezwa umsindo angathi yilawa amavidiyo eNigeria ngemva kwemizuzu ngezwa umsindo wakhona ukhwela ngagijima ngisithi ngiyelamulela umakhelwane mhlawumbe sengenelwe ngotsotsi.
“Ngathi ngivula isango ngahlangabezana lomakhelwane ethwele ugodo lwe-broom lomnawakhe bebhula umuntu njengamabele.”
Intombazane le iphume ngesikhala senalithi iphethe imvunulo yangaphansi ngezandla yaze yagqokela phandle.
Abalozwelo bazamile ukumvala ngamaphepha noma nje inengi lenze inhlekisa ngaye. Omele isikhulumi samapholisa esabelweni seMatabeleland South uChief Superintendent Francis Phiri uthe udaba olunjalo kakaluzwa njalo usabambekile ngomhlangano.
“Okwakhathesi sisabambekile emhlanganweni. Udaba lolu alukafiki kimi. Noma kunjalo sixwayisa uzulu ukuthi angathathi umthetho awufake ezandleni zakhe,” kutsho uChief Supt Phiri.
Online Reporter