admin
Cornelius Luphahla
KULENDODA yesigabeni seMagonteni eLupane esile ngokulambisa njalo ebonga amadlozi akwabo ngemva kokuba ithandelwe luhalabezi lwenhlathu idinga inkomo zayo yalamulelwa yizinja zayo.
Isehlakalo lesi senzakale ngoMgqibelo kuviki ephelileyo lapho uMnumzana Dumisani Ncube athandelwe khona yinhlathu eguswini edinga inkomo wasizwa yizinja zakhe akade ehamba lazo, uMthunywa ukuzwile lokhu.
UMnumzana Bigboy Bhebhe uthe inyoka le uhlala eyibona lapho ebithandele khona uNcube.
“Inyoka ethandele uNcube ngihlala ngiyibona eduzane lalapho emthandelele khona kodwa ngesabe ukuyibulala ngoba inkulu kakhulu. Kungakho nxa kuthiwa ibimthandele kangimangali sibili ngoba ngendlela ebilenkani ngayo kufanele ukuthi ibingamthandela umuntu,” kutsho uMnu Bhebhe.
UMnumzana Christopher Moyo onguye owancedisa uNcube ukubulala inyoka le uthe yena wezwa umsindo wathola uNcube ehlezi phezulu kwesigodo esopha ethi ubethandelwe yinyoka.
“Mina lami ngangidinga inkomo zami eguswini ngezwa umuntu ehlaba umkhosi lezinja zikhonkotha. Ngagijima ngaya khona ngathola uNcube ethithibele ephezulu kwesigodo ethi ubethandelwe yinhlathu njalo wayelimele.
“Uthe engitshengisa ngahle ngayitshaya ngogodo ngayibulala. UNcube ubelenhlanhla ngoba ubelezinja, aluba ubehamba yedwa yayizamginya,” kulandisa uMnu Moyo.
Intatheli ixhumane loMnumzana Dumisani Ncube wathi inyoka le imthandele engayiboni ngoba kuminyene wasesizwa yizinja zakhe ezayiluma yamekela.
“Mina inyoka le ngangingayiboni ngidinga inkomo eguswini ngezwa inyoka singithandele. Ngethuka kakhulu ngahlaba umkhosi kwathutsha izinja zami zayiluma yaze yangekela.
“Ngaba lenhlanhla ngoba zazingekho khatshana njalo layo inhlathu le yayingakangilimazi kakhulu. Yangidlepha nje kuphela enqagaleni izinja zaphanga zangilamulela.
“Ngemva kwalokho kwathutsha umakhelwane wami wangincedisa sayibulala,” kuphetha uMnu Ncube.
Online Reporter