YiNtatheli kaMthunywa
BAKHUZA imihlolo abangakaze bayibone isenzakala eNkayi, eMatabeleland North kusiga sokubulawa kwenye indoda, nanko imuli yakhe isikhalalele isidumbu, ifuna kukhitshwe inkomo ezilitshumi andubana ingcwatshwe.
Lokhu kuza ngemva kwesehlakalo esenzakale kumalanga asanda kwedlula lapho umntwana wakoMabhena lowakoMoyo abalwa, ngamahloka emavinkilini akoTshisa, eGwelutshena, eNkayi.
Udletshana olukhona, levidiyo esabalale kunkundla zokuxhumana, kubikwa umntwana wakoMabhena wasila kodwa wahlahlelwa ingalo, kuthi owakoMoyo yena walahlekelwa yimpilo.
Isizatho sokulwa kwabo kasaziwa, njengoba amapholisa esaphenyisisa ngodaba.
Kuvidiyo esisabalele enkundleni zokuxhumana itshengisa lesi sehlakalo sokukhalalwa kwesidumbu.
Kuvidiyo le, kuzwakala abantu besithi kumele “umufi aphiwe inkomo zakhe.”
Imifanekiso itshengisa isidumbu sikhitshwa enqoleni, abantu bebambisana ibhokisi, belingenisa kwenye indlu, egumeni lakoMabhena. Kulabo ababambisana ibhokisi, kulenina, okunakanelwa ukuthi kungabe kunguNkosikazi Mabhena.
Iphephandaba likazulu lizwe ukuba unina kamufi wacela ukuthi imuli yakoMabhena ingcwabe umntanakhe, esithi abantwana bebeganga.
Ngalokho, imuli yakoMabhena yavuma njalo yabhadala imali engange-US$800 yomngcwabo.
Sekuvunyelwene, kuzwakala izinto zatshintsha, imuli yakoMoyo yatshintsha amagiya yathi isifuna imbhadalo yenkomo ezilitshumi, ngesikhathi sekumele kubekwe umufi.
“Isidumbu sathi sesifikile ekhaya, izinto zatshintsha. Isidumbu sakhutshwa lapho esasikhona, sasiwa koMabhena, kwathiwa sekumele bakhiphe inkomo ezilitshumi,” kutsho omunye wabafakazi bodaba, oyisakhamuzi.
Isakhamuzi lesi sibike ngalokhu, ngesikhathi sinye sikhankasa emphakathini ukuthi kudingwa uncedo ngoba imuli yakoMabhena ingelayo indlela yokuthola inkomo lezo.
“Umdeni wakoMabhena kawulazo lezo nkomo. Ebilazo zimbili yizo kuphela ebezikhona esibayeni, njalo isibaya sivaliwe. Bengicela uncedo lokuncedisa umdeni wakoMabhena,” kubika lesi isakhamuzi.
“Okubuhlungu kakhulu yikuthi ubaba uMabhena uyisiphofu. Umama, uNkosikazi Mabhena, waphiwa isidumbu watshelwa ukuthi asingenise endlini, asifake embhedeni wakhe, njalo singasuki kuze kukhutshwe lezo nkomo. Umama lo bekungekho angakwenza.”
Kubikwa kwaba lusizi olukhulu izakhamizi sezizwela imuli le.
Isakhamuzi lesi esicele usizo kuzulu, sithe: “Abantu laba kayisizo zihlobo zami, kodwa bahlala ezabelweni ezingomakhelwane, njalo ngibuhlungu kakhulu ngesimo abakuso. Ngicela loba ngubani ongancedisa umdeni wakoMabhena ukuthi uthole inkomo ancedise.
Iphephandaba likazulu lixhumane lesikhulumi samapholisa elizweni, uCommissioner Paul Nyathi obike ukuba amapholisa asadingisisa ngodaba lolu.
“Ngisakhulumisana lamapholisa eNkayi ukuze sithole umbiko ogcweleyo ngendaba le,” kutsho uComm Nyathi.
Imizamo yokuthola umbiko ogcweleyo kwehle kwaze kwafika isikhathi sokudindwa kwephephandaba.
