Online Reporter
Ingxenye engaguqukiyo ithiwa ngumsuka
Isakhiwo sesenzo: umsuka
Hlolisisa izenzo ezilandelayo: -fa, -fela, -fisa, -fiwa; -dla, -dlela, -dlisa, -dliwa; -thola, -tholela, -tholisa, -tholelwa; -sukuma,sukumela, Sukuma.
Esikuqaphelisisa ngalezizenzo ezingaphezulu yikuthi lanxa isenzo singaze sibe siguquka ngayiphi indlela kukhona ingxenye yaso engaguqukiyo ezinjengalezi ezibhalwe ngaphezulu. Leyo ngxenye engaguqukiyo ithiwa ngumsuka.
Izivumelwano zesenzo
Isenzo singasetshenziswa lezivumelwano eziyimihlobo emibili: Isivumelwano senhloko lesivumelwano sikamenziwa.
Isivumelwano senhloko: Funda imitsho elandelayo: Umama uyahamba. Ithole lihamba. Ukufa kuyahamba. Udonga luyahamba. Emitshweni le sinanzelela ukuthi ingxenye yesenzo esekuqaleni kwesenzo sivumelana lebizo eliyinhloko yomutsho.
Okunye esikuqaphelisayo yikuthi ziyatshiyana lezi ngxenye kusiya ngezigaba zamabizo ayinhloko yemitsho yethu.
Okokucina esikubonayo yikuthi ingxenye zonke lezi zisekuqaleni kwesenzo. Zona lezingxenye zezenzo ezitholakala ekuqaleni kwesenzo zisenza isenzo sivumelane lenhloko yomutsho zithiwa yizivumelwano zenhloko.
Isivumelwano sikamenziwa
Funda imitsho elandelayo
Umfana uqhuba inkomo. Umama uphothula uhayezi. Umbalisi ufundisa abantwana. Emutshweni wokuqala ibizo elithi umfana liyinhloko yomutsho. Okwenziwa ngumfana yikuqhuba, ngakho igama elithi qhuba liyisenzo. Umfana uqhuba inkomo. Igama elithi inkomo ngumenziwa ngoba liveza ukuthi lokho okwenziwa ngumfana kwenziwa kubani.
Sizaqala lapha ngeviki ezayo.
