Online Reporter
Ethel Ncube
AMAPHOLISA eGwelutshena, esabelweni seMatabeleland North, abika ukuba aphezulu kokuphenya amacala okuzama ukubulala lelokubulala ayenzakala eSigilikithi Village, koSikhobokobo mhlaka 15 Mfumfu lonyaka.
Kubikwa izelamani ezimbili, uYizo Dlodlo (46) loMduduzi Dlodlo, zahlasela umamangala lomkakhe ngenduku lamahloka befuna iUS$15 ababeyibhadale emthethwandaba kasobhuku ngecala lokwekela inkomo zisidla endaweni okungamelanga kungene izifuyo khona.
Isakhamuzi esikhulume lephephandaba likazulu sibike ukuba amadoda la ayahlupha esigabeni njalo bahlezi behlukumeza abantu.
UYizo lomfowabo uMduduzi basuka ebusuku bayahlasela imuli yakoMathe befuna imali abayibhadala kusobhuku. Abemuli yakoMathe bahlaba umkhosi kwatheleka uNdumiso Mathe loVelele Sibanda.
Ekufikeni kwabo kubikwa kwabanzima, kuliwa kutshaywana kungadlalwa kwacina kulimele uMduduzi ebaleka, uYizo yena wedlula emhlabeni.
Ekufikeni kwabo bafika bahlasela izelamani zakoDlodlo ngokusweleka kwenhlanhla uYizo wahle wedlula emhlabeni khonapho, kwathi uMduduzi Dlodlo labanye omamangala ababili balimala kakubi.
Amapholisa aveze ukuthi asachwayisisa ngecala lokubulala lokuzama ukubulala.
“Amapholisa asachwayisisa ngamacala okuzama ukubulala kunye lokubulala lapho okutshone khona uYizo Dlodlo, uMduduzi wabaleka elamanxeba.
“Ometheswacala bebehlasele imuli befuna imali abayibhadaliswa kusobhuku yokuhambisa inkomo emadlelweni angakavulelwa inkomo. Bahlaselwa ngamahloka, imiqwayi lenduku,” kutsho isitatimende samapholisa kukhasini labo lokuxhumana.
