adminCornelius Luphahla
KULEMULI yeMbondo eLupane ezahlala izidla izibindi kulandela ukufa kwezibulo lemulini le ngemva kokutshaywa ngondofa kubangwa ilifa, uMthunywa ukuzwile lokhu.
Impicabadala le yenzakale kunyanga edluleyo lapho okucatshangelwa ukuba uNgqabutho Moyo ohlala ngaphansi kukaSobhuku uDingani Mpala atshaywe khona ngondofa belinye ilunga lemuli le.
Kuzwakale ukuba umuyi ozalwa esithenjini waxabana labafowabo kubangwa ilifa likayise uJosiah Ndlovu.
Intatheli ixhumane loNkosazana Busi Ndiweni unina kaNgqabutho wachaza ukuthi umtanakhe watshaywa ngondofa ngemva kokuxabana labafowabo ngesikhathi kusabiwa ilifa.
“Sathi silungiselela umbuyiso womkami abantwana bakanyanewethu bathi ilifa lonke ngelabo mina labantwabami kasitholi lutho. UNgqabutho wakwala lokhu njengoba kunguye obemdala.
“Ngemva kwalokho unyanewethu wathi kalisoze litshone ilanga uNgqabutho ephila njengoba ethi laye ilifa uyalifuna. Lakanye lathi lingakatshoni umntanami ngamthola ewele phambili kwesiphala esithi utshaywa ngabafana abancane,” kulandisa uNkszn Ndiweni.
Uqhubeke njalo wachaza ukuthi kusukela khonapho umntanakhe wahle waqalisa ukugula umkhuhlane wengqondo njalo wabhubha ngemva kwamaviki amabili.
Esinye njalo isakhamuzi sakule indawo esiyisihlobo semuli yakoNdlovu, uMnumzana Phumulani Ndlovu sichaze ukuthi sasikhona kubangwa ilifa.
“Mina ngangikhona mhla sikhuluma ngendaba yokwabiwa kwelifa lomfowethu njalo ngamuzwa unyanewabo kaMaNdiweni esithi kalisoze litshone ilanga uNgqabutho ephila. Ngakho ngilokumangala okukhulu ngoba lathi lisiyatshona setshaywe ngondofa,” kuchaza uMnu Ndlovu.
Ekhuluma lentatheli lo ocatshangelwa ukuthi ulesandla ekufeni kukaNgqabutho, uNkszn Ndebele uveze ukuthi kazi lutho ngokugula lokho, abantu bayamgcona nje.
“Abantu balapha bayangizonda yikho bengigcona kangaka bethi yimi engatshayisa uNgqabutho ngondofa. Ukuthi ngathi kalitshoni ephila ngakutsho sibili kodwa kwakuyikuzonda ngangikhuluma into engingayenelisiyo,” kutsho uNkszn Ndebele.
Usobhuku uMpala ubikele iphephandaba likazulu ukuthi wakuzwa ukuthi uMaNdebele wathi kalitshoni uNgqabutho ephila.
“Lami ngakuzwa ukuthi uNkszn Ndebele wathi kalitshoni ilanga uNgqabutho ephila wasetshaywa yizinto. Kodwa akulanto engangingayenza ngoba yena uyala uthi kayisuye owamtshayisayo,” kuphetha uSobhuku uMpala.
Online Reporter