adminCornelius Luphahla
ZISELE zikhuza imihlola izakhamizi zesigabeni seLake Alice eLupane ngemva kokuba enye indoda ihlahlele omunye ngenkalakatha yehloka kubangwa umakhalekhukhwini, uMthunywa ukuzwile lokhu.
Imbedumehlwana le yenzakale ngoMgqibelo kuviki ephelileyo lapho uMaffin Nyoni (25) ohlala ngaphansi kukasobhuku uLameck Nyoni agamule khona uMgebhu Ncube (28) wamtshiya ebangwa lezibi.
Kubikwa uNcube ubefela ukutshontsha umakhalekhukhwini.
UMthunywa uxhumane lesinye isakhamuzi sakule indawo uMnumzana Jabulani Ndiweni wachaza ukuthi umsolwa wathutsha ngemva kokuphela komdlalo wenguqu ethwele ihloka wafika wagamula umamangala.
“Sathi siqeda ukudlala inguqu kwathutsha uNyoni ethwele ihloka elikhulu wafika wagamula uNcube ekhanda wawela phansi andubana aqhubeke embhaxabula ngomphini walelihloka waze waqamuka,” kuchaza uMnu Ndiweni.
Uqhubekele phambili wathi samuntu owayefikelwe lidlozi umsolwa waphinda wahlasela ababemlamula waze watshaya lepholisa lanxa izakhamizi zenelisa ukumbamba wabotshwa.
Esinye isakhamuzi sakule indawo uMnumzana Gilbert Thebe sibikele intatheli ukuthi umsolwa uthe umamangala wamtshontshela umakhalekhukhwini yikho wamgamula.
“UMaffin (Nyoni) wathi ebuzwa ngamapholisa ukuthi ubemgamulelani uMgebhu wathi umgamulele ukuthi wamtshontshela umakhalekhukhwini wakhe ayemtshiye esitolo se-Lake Alice. Wathi okwenza athi nguye yikuthi wezwa ngabangane bakhe njalo wamuzwa embuza ukuthi ifoni yakhe ingaphi ngapho emhleka ethi kasoze ayibone uzakhawula,” kutsho uMnu Thebe.
UNkosazana Simelinkosi Ncube oyisakhamuzi kule indawo ubikele intatheli njalo ukuthi kungakabi lempi le, uNcube wayeke wathembisa uNyoni ukumgwaza.
“UMgebhu emalangeni amathathu engakaganyulwa nguMaffin wayeke wamxotshanisa ngengqamu efuna ukumgwaza ngemva kokuba embuze ngomakhalekhukhwini wakhe. Ngakho ngokubona kwami ingxabano le yayivele isindala,” kuchaza uNkszn Ncube.
UNyoni kubikwa wathwalelwa esibhedlela seSt Luke’s lapho afika wadluliselwa esibhedlela seMpilo koBulawayo.
Intatheli ixhumane lesikhulumi samapholisa uInspector Siphiwe Makonese waveza ukuthi umbiko onjalo sebewuzwile.
“Umbiko lo sesiwuzwile ngakho umsolwa usemapholiseni eLupane noma nje icala lakhe lingakathoniswa.
“Sithanda ukukhuthaza uzulu ukuthi nxa kulokungezwani badinge abantu abadala abangabaphathisa ukuthi bakhumisane umlotha kumbe bafike emahofisini amapholisa babone labo ababona ngobudlelwano,” kuphetha uInsp Makonese.
Online Reporter