Online Reporter
Ethel Ncube
KWEHLE iyezi elimnyama emulini yakoNdlovu eGwakwe Mine, eGwanda kulandela ukutshaywa ngesikhuni komntwana kwelinye ilunga kwasekungenela uyise kanti sokuzakuba ngokunye nanko wedlula emhlabeni ngesikhathi kuliwa.
Isehlakalo lesi senzakale kuviki ephelileyo lapho uWashington Ndlovu atshaywa khona ngesikhathi engenela kusilwa umntanakhe wayafela esibhedlela seGwanda ngelanga elilandelayo.
Kubikwa ukuba umetheswacala uSandra Mpofu wathola abantu bezikwejisele wathi wonke umuntu akathule umsindo, abanye bathula uWillbert Ndlovu waqhubeka elokhu ekhuluma umetheswacala wadobha isikhuni somlilo watshaya uWillbert, lokhu akuzange kuphathe kuhle uyise uWashington owasuka wangenela indaba le.
UWashington waxabana loSandra ukuthi utshayeleni umntanakhe ngesikhuni, uSandra wathatha ugodo watshaya uWashington Ndlovu (53) ekhanda. Uthe esemtshayile wathwalelwa esibhedlela seGwanda lapho afika wedlula emhlabeni ngelanga elilandelayo.
Umetheswacala wabotshwa, uzaphindela emthethwandaba mhlaka 15 Ncwabakazi.
Intatheli ixhumane lesikhulumi samapholisa eMatabeleland South uInspector Chiratidzo Dube obike ukuba indaba le yafika kubo.
“Sabopha uSandra Mpofu ongumsolwa ecaleni lokufa kukaWashington Ndlovu. Sicela uzulu ahloniphe umthetho njalo nxa kuthe kwaba lohlupho abantu bangalwi bebanga into engakhulunyiswana kudlule,” kubika uInsp Dube.
