Online Reporter
Ethel Ncube
ZIKHAKHAMELE izakhamizi zeMugabi, eMsilahobe ngaphansi kwenduna uMalisa kulandela ukubulawa komunye umakorokoza ngabanye bakhe kubangwa isikhwili.
Indaba le yenzakale ngempelaviki lapho uThembani Tshabalala ahlaselwe ngamanye amakorokoza ayisithupha ngakibo elele.
Amakorokoza enze lokhu abalisa uXolani Ncube, Busani Ncube, Dalubuhle Mathe, Everest Thembani Mazango, Trust Ncube loMichael Mathe.
Kubikwa abayisithupha laba bambulalela isikhwili esenzakala ngesikhathi begebha igolide eMatopo.
Kuvele ukuba uTshabalala wayelele endlini abetheswacala bafika bavula umnyango ngamandla, loba wenelisa ukubaleka bamhlala izithende bambamba emasimini bafika bamhlahlela ngehloka baphinda bamgwaza ngengqamu bamtshiya efile babaleka.
Abantu abezwa umsindo lo bagijima bayabona bathola uTshabalala esedlule emhlabeni.
Izakhamizi zabikela amapholisa afika athwala isidumbu basisa esibhedlela ukuze siyehlolwa imbangela yokufa.
Intatheli ixhumane lesikhulumi samapholisa eMidlands uInspector Emmanuel Mahoko obike ukuba abantu nxa belengxabano abakhulumisane.
“Sikhuthaza uzulu ukuthi nxa bethe baxabana abalungisise ngokukhulumisana hatshi ngodlakela. Udlakela lucina ludala ukulahleka kwempilo ikanti bekungakhulunyiswana kulungiswe kungalahleki umphefumulo womuntu,” kuphetha uInsp Mahoko.
