Online Reporter
Ethel Ncube
KULENDODA yeGokwe ebulele enye eNewtown, eKwekwe ngemva kokungazwanani kubangwa izigqoko ezatshontshwayo ngeviki ephelileyo.
Umuyi uFuture Makupe wabonwa ngesinye isihambi efile endleleni okwadala ukuba kubotshwe uLibermani Ncube langalinye okwatholakala isidumbu leso.
Kubikwa ukuba kuyonale inyanga mhlaka 18 esinye isihambi esasizidlulela emadabukakusa sathola isidumbu siphakathi kwegazi endleleni sayabikela amapholisa.
Amapholisa ekuchwayisiseni ngaloludaba athola ukuba uNcube ulesandla ekufeni kukaFuture bayamdinga wabotshwa.
Kubikwa ngesikhathi ebotshwa uNcube watholakala elengqamu yohlobo lwe-Okapi eyayigcwele igazi okwabangela ukuba kucatshangelwe ukuthi angabe enguye owagwaza uFuture ngemva kokuba behluleke ukuzwisisana bebanga izigqoko ezatshontshwayo.
Ingqamu le bayithatha ukuze isetshenziswe njengobufakazi.
Isikhulumi samapholisa eMidlands uInspector Emmanuel Mahoko uveze ukuba indaba le isezandleni zamapholisa.
“Sithanda ukwazisa uzulu ukuthi nxa ethe waba lokungazwisisani kabadinge owesithathu ongabancedisa ekuxazululeni ingxabano hatshi ukulwa.
“Sicela njalo ongabe elolwazi mayelana ngokubulawa kukaFuture Makupe ukuthi athintane lamapholisa aweZRP eKwekwe,” kuphetha uInsp Mahoko.
