Online Reporter
Lovemore Dube
UMQEQETSHI weHighlanders uPieter De Jongh uthe isifiso sakhe esikhulu yikuthi engeze isikhathi sakhe ekuleliqembu ngoba uhlose okukhulu kilo.
Ukhulume lokhu kuphethwa isizini yeCastle Lager Premiership kodwa, abafakazi abaqotho abaseduzane lamahofisi eHighlanders bathe kungenzeka ukuthi lumqeqetshi axotshwe umsebenzi kusiyafika umhlaka 31Mpalakazi 2025, lapho okuphela ikontileka lakhe.
Umqeqetshi ungene umsebenzi ngesikhathi kuphuma uKelvin Kaindu, iHighlanders ikusimo esibi kumkhankaso weCastle Lager. Laye uDe Jongh imehlule ukuthi ayiguqule, nanko isile ngesikhala senalithi ukuthi iqunywe lizembe kuPSL.
Lobanje ingani itshile imimoya yabalandeli bayo kumnyaka ka2025, isile ngesikhala senalithi. Iphose yaphuma kuzinga lenguqu eliphezulu elePremier Soccer League.
Ekhuluma leZimpapers Sports Hub ngoLwesibili ntambama, uDe Jongh uthe ukholisile ukusebenza koBulawayo.
Uthe wamukelwa ngothando waphathwa buthakathaka lidolobho lonke njalo kungaba kuhle ukuthi aqhubeke ekuBosso.
“Bekukuhle ukusebenza kuBosso. Abantu bakoBulawayo bangiphethe kuhle njalo ngikhwabithile indlela engisebenze ngayo kuHighlanders labanye bami,” kutsho uDe Jongh.
Uthe yena elethwa kuHighlanders okwakumqoka yikuthi ingatshoni.
“Ngithe ngibizwa kuHighlanders ngaqonqoselwa ukuthi ingatshoni, liqembu elikhulu elabantu njalo kungababuhlungu nxa ingatshona. Sisebenzile lalabo akade bekhona senelisa ukuthi ikhuba lingatshoni, khathesi sokuyikukhangela phambili sibone ukuthi singayivusa njani,” ugcizelele uDe Jongh.
Uthe yena uzimisele ukuthi ahlale akhe iBosso ibeliqembu elingancintisana lamanye adlala ngcono.
“Ngifisa ukuthi abaphathi beBosso benginike ithuba, ngiqhubeke ngisebenze, ngiqoqe abadlali abazimisele ukuphakamisa iHighlanders. Ngesimo sayo, akusikho lapho emele ibekhona. IHighlanders liqembu elikhulu njalo elilembali ehlabusayo ngakho, kumele lidlalele phezulu.”
UDe Jongh ngumqeqetshi wokucina ukuthwala inkezo leHighlanders ngo2019, eyeChibuku Super Cup. Uthe inhliziyo yakhe ikoBulawyo.
“Kusezandleni zenkokheli zeHighlanders ukuthi ngiyahlala kumbe ngiyahamba. Inhliziyo yami ilapha koBulawayo, kuHighlanders. Ngilethemba ukuthi ngemva kokusebenza esikwenzileyo, iqembu libamba indawo kuPSL, bakubonile lokhu njalo banganginika elinye ithuba sisebenzeni,” kutsho lumqeqetshi.
Uyavuma uDe Jongh ukuthi abadlali abakhona khathesi bafuna ukuphathiswa ngokuletha abanye abaqinileyo.
