Online Reporter
Nkosilathi Sibanda
ISIGABA seBubi, esabelweni seMatabeleland North sizimisele ukwengeza izinga lengqubekela phambili yenhlelo zomphakathi nanko sekuhlelwe ukuqhutshwa kwemihlangano ethile kulindawo, kubunjwa amaqhinga amatsha omnyaka ka2026.
Lokhu kubikwe yihofisi yeBubi Constituency kuliviki.
Imihlangano le izagxila njalo ekwethulweni imbiko, ukuhlaziywa kwemisebenzi kazulu lokuhlela intuthuko.
Ngokunjalo, sekwethulwe amalanga lendawo lapho okuzakwenziwa khona imihlangano le.
Imihlangano le izaphinda njalo inikeze izakhamizi ithuba lokubeka amacebo entuthuko yomnyaka ka-2026, ehambisana lenjongo yelizwe ekaVision 2030, yokuthuthukisa umphakathi.
Umhlangano wokuqala uzakuba khona ngoMvulo mhlaka 21 Zibandlela eSiganda Community Hall, kuma-ward angaphansi kwakoNkosikazi.
Kuzalandela umbuthano mhlaka 13 Zibandlela eTatazela Hall eNyathi.
Kubikwa ukuthi kumihlangano le kunxuswe izakhamizi zakulindawo, inkokheli zomdabu lazo zonke ingatsha ezisebenza lomphakathi.
“Sikhuthaza bonke abantu besigaba seBubi ukuthi beze ngobunengi, bathathe indawo baxoxisane lommeli wabo ePhalamende kunye labakhokheli be-constituency,” kutsho umbiko ophumileyo.
Imihlangano le ibalulekile ekwakheni ukubambana lokuhlanganisa imibono yomphakathi ukuze intuthuko ifinyelele kuzo zonke iziqinti zeBubi.
