Online Reporter
YiNtatheli kaMthunywa
KUBOTSHWE indoda eleminyaka engu-41 yokuzalwa eSanyati kulandela ukudubula ibulale ipholisa enkambeni ngeSonto ekuseni.
Isikhulumi samapholisa elizweni uCommissioner Paul Nyathi uqinisekise ngokubotshwa kukaVengesai Jabulani Mutasa (41) okubikwa wadubula wabulala uConstable Courage Muchechesi enkambeni yamapholisa yeSanyati.
“Amapholisa eZimbabwe Republic Police aqinisekisa ngokubotshwa kukaVengesai Jabulani Mutasa (41) kulandela ukubulala ngesihluku uConstable Courage Muchechesi enkambeni yeSanyati,” kutsho uCommissioner Nyathi.
Ngemva kokubulala ipholisa, uMutasa wangena e-charge office ephethe umbhobho wafika wakhombela abantu ababelapho andubana aqile uAbraham Mayavo (30) i-US$5.
Uthe umetheswacala ubedingwa ngamapholisa esolwa ngecala lokubulala usomabhizimusi uJoseph Mutandadura ngenyanga kaNcwabakazi nyakenye, kubikwa waqala wadubula uDetective Constable Ngwenya wohlangothi lweCID Homicide Unit, owayengomunye wequla elalizama ukumbopha.
“Ngemva kwalokho wadubula uConstable Muchechesi, andubana aqile uAbraham Mayavo (30) iUS$5 ngesikhathi esenza umbiko emapholiseni,” kutsho uCommissioner Nyathi.
Uncome izakhamizi zeSanyati, Kadoma, Chakari kunye lePatchway ezaphanga zaqoqana zancedisa ekubotshweni kumametheswacala engakabaleki.
“Amapholisa abonga izakhamizi zeSanyati, Kadoma, Chakari kanye lePatchway ngokuqoqana ngokuphangisa zancedisa ekubotshweni kukametheswacala. Amapholisa azakwethula okunengi ngendaba le ngokuhamba kwesikhathi,” kutsho yena.
