Online Reporter
YiNtatheli kaMthunywa
KUSIGA esihlasimulisa umzimba, kulendoda yeFort Rixon esabelweni seMatabeleland South ebulele umntanayo olenyanga ezimbili ezelwe kulandela ukuxabana lomkakhe kubangwa ukungathembeki emtshadweni.
Isehlakalo lesi senzakale esiqintini seKishambe ngaphansi kwenduna uJahana mhlaka 23 Nhlangula.
Indaba le eyaqala kuyikungazwisisani phakathi kuka Israel Chisongo (37)bephoselana amazwi anzima lomkakhe uMartha Moyo (28) esithi unkosikazi wakhe kathembakalanga emtshadweni njalo usane lolu, uAaron Chisongo kalusilwakhe. Kuzwakale ukuthi bathi belokhu bephikisana uChisongo wahluthuna umntwana ezandleni zikanina, wamlalisa phansi, wakhupha ingqamu andubana amqume abe zincezu ezine.
Kubikwa esenza lokhu uChisongo wayephethe esithi ufuna ukubona inkaba yakhe.
Umntwana esefile kubikwa wathatha isidumbu wayasiphosela esambuzi andubana athathe ingubo zakhe ayeziphosela lazo phakathi wasefaka amatshe phezulu. Isehlakalo lesi sitshiye izakhamizi zeFort Rixon zimadolonzima njalo zibabaza ukuthi kazikaze zibone okunje lokhu zathwetshulwa yingwe.
Isikhulumi samapholisa eMatabeleland South uInspector Chiratidzo Dube uveze ukuba udaba olunjalo lusezandleni zamapholisa.
“Samukele umbiko wendoda ebulele usane oluleminyaka emibili, indoda le isisezandleni zamapholisa njalo alokhu esachwayisisa ngodaba lolu,” kutsho Insp Dube. Isikhulumi samapholisa sixwayise uzulu ukuba adinge ezinye indlela zokuxazulula ingxabano kulokulwa.
