Online Reporter
Nkosilathi Sibanda
UMONGAMELI uMnangagwa usenxuse izizalwane zakuleli ukuthi zizigqaje ngempilo kamuyi owayenguMsekeli kaMongameli uDokotela Joshua Nkomo, owedlula emhlabeni mhlaka 1 Ntulikazi, 1999.
Lamuhla, ngemva kweminyaka engamatshumi amabili lesithupha, iZimbabwe ingakhangela emuva ngokuziqhenya ngempilo yomkhululi, usopolitiki okhaliphileyo, iqhawe lePan-Africanism.
Umntwana wenhlabathi, uDokotela Nkomo ubekhuthalele indaba zomhlabathi, ebabaza ngokuthi yiso isizatho esikhulu sokuya empini, kutsho uMongameli Mnangagwa.
UMongameli Mnangagwa uthe uDokotela Nkomo kazange aphile ukuze abone uhlelo lweLand Reform Programme olwaqala ngemva komnyaka engasekho.
Kodwa-ke, ukubabaza kwakhe ngokubambana kuqhubekele phambili, kwakhuthaza isizwe ukuthi sibuyise amagugu aso.
Lokhu sekukhuthaze abalimi abasacathula ukuthi bephule amarekhodi kwezokulima ezigabeni ezingaphansi zokulinywa kwegwayi, ukufuya inkomo zochago le-horticulture. Lezi lezinye indaba zempumelelo kuleli zihambisana kuhle lombono othi, “Ilizwe lakhiwa ngabanikazi”.
UMongameli Mnangagwa uthe uDokotela Nkomo unikele impilo yakhe yonke ekukhuthazeni abesilisa labesifazana abacindezelweyo.
Abangane bakhe ababesondelene laye ngeminyaka yokukhula kwenhlanganiso ezilwela amalungelo abantu abagoqela abangasekho emhlabeni uBenjamin Burombo, Masotsha Ndlovu, George Nyandoro, Michael Mawema, Morton Malianga lo u-R G Mugabe basebenzisana loDokotela Nkomo ukubumba iNational Democratic Party, behlose ukukhulula ilizwe kumbuso wabelungu.
Amavili omzabalazo awazange ame ngemuva kwalokho, kwaze kwaba yilapho kuzalwa ilizwe lethu elithandekayo iZimbabwe ngo-1980.
UDokotela Nkomo uke wabotshwa enkambeni ezidumileyo ezifana leGonakudzingwa, kodwa imizamo yabahlukumezi yehluleka ukumephula umoya wakhe, kutsho uMongameli Mnangagwa.
Njengoba ilizwe lethu likhangelele ukukhumbula amaqhawe lamaqhawekazi ethu kunyanga ezayo kaNcwabakazi sithi umphefumulo kamuyi uFather Zimbabwe, Chibwe Chitedza, Umdala Wethu, uDokotela Joshua Mqabuko Nyongolo Nkomo uphumule ngokuthula okungapheliyo.
