Online Reporter
Yintatheli kaMthunywa
IZAKHAMIZI zeDolo eMberengwa koMagaba zisele zibambe owangaphansi kulandela ukuzwa ngabesilisa bomdeni owodwa akade sebelesikhathi behlukumeza umntwana okugiredi 3, oyisihlobo sabo, emacansini.
Umntwana lo kubikwa ulalisiwe kwesinye isibhedlela seMberengwa njalo uzakwedluliselwa esibhedlela seGweru lapho okumele athole ukwelatshwa ngodokotela.
Esinye isakhamuzi esingumakhelwane esale ukuqanjwa ngebizo esixhumane lentatheli siveze ukuba badinga usizo ukuba indaba le isetshenzwe ngendlela.
“Umntwana lo kumele abe sesikolo kodwa ubengasafundi ngenxa kokusweleka kwemali.
Abantwana laba vele bathathu, kuthi lo obehlukunyezwa, kube lomunye oyinkazana oleminyaka emibili lomunye ongumfana. Umama wabantwana laba kaphilanga kuhle engqondweni, kahlali ekhaya, kungakho-ke abantwana basala logogo labanye abafowabo bakanina wabantwana.
“Umntwana lo oyinkazana kukhanya kuleminyaka ehlukuluzwa ngalindlela. Ubengakhulumi ehlukunyezwa ngabemuli.
“Ngeviki ephelileyo wabizwa ukuba bamthume wathi kezwa kuhle uphethwe yisisu. Ngemva kokumkhangela umntwana, kubikwa bafumana ukuba ulimele kakhulu esitho sangasese okwenza bahle bamgijimisela esibhedlela seMasase. AbeMasase labo bamedlulisela eMberengwa District Hospital njalo khathesi kubikwa kumele edluliselwe phambili njalo esibhedlela eGweru,” kubika lesi sakhamuzi
Okhulume emele imuli ubike ukuba bacela ukuncediswa abantwana laba bayegcinwa kwenye indawo ngoba ekhaya lapha abaphathekanga kuhle.
“Kubuhlungu okwenzakala kuleliguma, sicela uHulumende angenele abantwana bathathwe. Abantu abasolelwa ukuba badlwengula umntwana lo ngamadoda ayi-5. Kukhanya kade aqala ukumtshintshana. Okubuhlungu yikuba ubengasayi esikolo obekusenza kubelula ukuthi batshone bemhlukuluza lumntwana.
“Kulomunye ongumsolwa othethwe ngamapholisa, ongumakhelwane. Laye usolwa ngokwenza umntwana lo umfazi.
“Kudingwa usizo ngoba omncane lo oyinkazana uleminyaka emibili, engakhula mbijana laye balakho ukumdlwengula sidinga ukuba abantwana laba bathathwe ngoba ugogo laye usekhulile uyabe engaboni okwenzakalayo,” kubika lo owemuli.
Intatheli ixhumane lesikhulumi samapholisa elizweni u-Commissioner Paul Nyathi obike ukuba kusaphenyisiswa ngaloludaba.
“Sisalandelela udaba lolu sizalazisa ngokugcweleyo,” kulandisa u-Commisioner Nyathi.
