Online Reporter
SINZIMA isimo esibhedlela seVryheid, kulandela isehlakalo esenzakale ngoLwesibili, lapho omunye wabaphathi, wesifazane, ekhululise izisebenzi zesifazane zasala zinqunu, ezisola ngokweba i-R200 yakhe.
Kubikwa ukuthi lokhu kudunge isimo kulumtholampilo njengoba sekukhona abafuna amiswe lumphathi (igama lakhe silalo) kulandela isenzo sakhe, ezisebenzini ezingamaCommunity Health Care Workers. Kuthiwa lesi sehlakalo senzakale kubuka amalunga omphakathi abekhona emtholampilo, okwehlise isithunzi salezi zisebenzi okuthiwa bezisetshwa ngonogada zinqunu, kubhekwa imali okuthiwa ilahlekile.
NgoLwesine inyunyana iNational Public Service Workers Union (NPSWU) ibihambele esibhedlela lesi ngenhloso yokuhambisa izikhalazo kubaphathi bawo. Ikubeke kwacaca ukuthi lumphathi ifuna amiswe umsebenzi nxa sekuqhubeka uphenyo ngalesi sehlakalo.
Ngelanga lesehlakalo, kubikwa ukuthi lesi sikhulu sabika ukuthi silahlekelwe yimali yaso engange-R200, eyayisehofisini yaso. Kuthiwa sibe sesisola izisebenzi ezinhlanu ukuthi ziyathinteka kulokhu, sabe sesizibiza sazibuza, okuthe nxa ziyilandula imali, sabiza onogada ukuba bazisetshe.
Kuthe nxa bengayitholi imali, sayalela izisebenzi ukuba zikhumule zisale zinqunu ukuze zizoseshwa kahle ukuthi kaziyifihlile yini ezithweni zangasese.
Lokhu kuthiwa kubonwe nangabanye abantu abebekhona emtholampilo, kuthiwa indawo abebesetshelwa kuyona ivulekile, okwenza kubelula ukuthi umuntu oseduzane abone ukuthi kwenzakalani phakathi. Kuthiwa kuze kwangenelela amalunga omphakathi abesemtholampilo ngoba engahambisani lalokhu abekubona kusenzakala.
UMnumzana Bhekizenzo Zulu weNPSWU, obezifikele mathupha kulo mtholampilo uthe: “Sifuna ukuthi lesi sikhulu simiswe umsebenzi kube kuqhubeka uphenyo. Onogada abathintekayo labo sithi mabathathelwe amanyathelo ngoba lokhu abakwenzileyo kuphambene lomthetho. Sifuna izisebenzi ezithintekayo zithole usizo lokwelulekwa ngokwengqondo ngoba zehliswe isithunzi ngokukhululwa zisale zinqunu abantu bebukele.”
Okhulumela uMnyango wezeMpilakahle eKwaZulu-Natal, uMnumzana Ntokozo Maphisa, uthe loludaba selufikile kibo. Uthi kuyalelwe ihofisi lesifunda ukuba lululandele. Uthi kabahambisani nokuhlukunyezwa kwezisebenzi.-Ilanga.
