Online Reporter
Sukoluhle Dube-Matutu
KUDABA olusansumansumane, kubikwa kulenina leWest Nicholson okucatshangelwa ukuba litshiye isikhwama salo phansi limisa imota lathi litshibilika ukuba lisidobhe lafica sesiphenduke saba nguxamu.
Isehlakalo lesi esisemlonyeni yezakhamizi zendaweni le senzakale kuyonale iviki.
Inina leli kubikwa lalime emgwaqweni limisa izimota eziya eGwanda.
Kubikwa kulemota eyafika yama ukuze agade, kodwa isimanga kwaba yikuthi wathi esesithi adobhe isikhwama sakhe, wabona sekuloxamu lapho ayefake khona impahla zakhe.
Abafakazi baveze ukuba inina leli lahlaba umkhosi libona lokhu kukanti umtshayeli wahle wasukumisa imota yakhe ngesiqubu esikhulu. Inina leli kubikwa laqonda komunye umuzi oseduzane, lihlaba umkhosi ukuthi isikhwama salo sesiphenduke saba nguxamu, indaba ezethusa izakhamizi zendaweni le.
“Ngangingalazi inina leli,” kutsho uSehlule Mpofu ohlala eduzane. “Wayemelele izimota, lapho athi sesukumisa isikhwama sakhe, wananzelela ukuthi sesiphenduke saba nguxamu. Ngamlandela saya emgwaqweni, lami ngambona uxamu lowo. Ukumbona kwenza inhliziyo yami yatshaya ngamandla. Ngehluleka ukuba ngimsize ngoba lami ngangisesaba.”
UMpofu uthe inina leli lasuka lahamba liqonda eGwanda, kukanti izakhamizi zazigijima zisiyabona uxamu lowo. Ngemva kwesikhatshana abantu basebegcwele bebona uxamu lo owayesengaphansi kwesihlahla.
“Kangizange ngibone isikhwama siguquka kodwa ngabona uxamu,” kutsho uLindsay Dube. “Abantu bathi kwakuyisikhwama sowesifazana. Umnikazi wesikhwama wadideka ingqondo wasuka wahamba.
Lokhu akukaze kwenzakale.
“Kwakulesikhwama kodwa sangasabonakali, kwasekubonakala uxamu. Lawe uyakubona. Kutsho ukuba isikhwama saphenduka saba nguxamu,” kutsho omunye othengisayo.
UNkosazana Ukelia Sibanda yena uthe lobu yibuthakathi. “Lokhu kungazwakala sengathi yikuhlanya kodwa kunengi esesikubonile kusenzakala okungachasisekiyo. Lokhu kungaba ngokunye kwakhona,” kutsho yena. “Izikhathi ezinengi izinto ezifana lalezi zenziwa ngabathakathi kumbe njalo nxa umuntu ethukiwe. Mhlawumbe ukhona owathakatha inina leli.”
Kubikwa uxamu lo waqeda amahola amathathu abantu abavela eduze lakhatshana belokhu bezombona.
Esinye isisebenzi seZimbabwe Parks and Wildlife Management Authority esadlula lapho saxwayisa izakhamizi ukuthi zingalimazi isinanakazana lesi, ngoba ukubulala inyamazana zendle kulicala.
