Sidumisile Mabena
Innocent Kurira
ABALANDELI bebhola kuzamele bakhangelele ukukhipha imali enengi ngemva kokuba i-Premier Soccer League (PSL) ibike ukuthi isikhweze imali yokungena enkundleni kulisizini, nanko itikiti eliphansi selizabiza i-US$5.
Ngokwesaziso esikhitshwe yinhlanganiso le ngoMgqibelo, abalandeli abafuna ukuhlala endaweni yeVIP kunye leGrandstand bazabhadala i-US$15 kuthi indawo yeVVIP ibe yi-US$25.
I-PSL ithe isinqumo lesi sathathwa ngemva komhlangano we-Emergency Committee owaqhutshwa mhlaka 5 Mbimbitho, lapho okwakuhlaziywa khona indaba yemali yokungena enkundleni lokunye.
Kumbiko wayo, iPSL ithe ukukhuphuka kwemali yokungena enkudleni kubangelwe yikukhwela njalo kwendleko zokulungiselela imidlalo.
“Lokhu kudalwe yikhwela kwentengo zendleko zemisebenzi ephathelane lomdlalo, imithelo esemthethweni laleyo okumele okumele ibhadalwe ngamakilabhu ngesikhathi ehlela imidlalo yePSL,” kutsho iPSL.
Inhlanganiso le iphinde yathi izama ukuncedisa amaqembu ukuthi enelise ukubhadala indleko zokuphatha imidlalo lokusiza ekuthini abalandeli bafinyelele enkundleni.
“I-PSL izimisele ukuthi amakilabhu ahlangabezane lendleko zokuphatha imidlalo ngesikhathi abalandeli labo besakwazi ukubukela ibhola, ngoba bangabanye abaqakathekileyo emdlalweni,” kutsho iPSL.
Kusenjalo, iPSL ixwayise abalandeli ukuthi akulamuntu ozabukela umdlalo ophakathi kwe Herentals leChicken Inn ohlelelwe ukudlalwa ngoMgqibelo eRufaro.
Inhlanganiso le ithe umdlalo lo uzadlalwa kungelabalandeli njengoba iHerentals ilesijeziso esakhitshwa yiPSL Disciplinary Committee nyakenye.
Isiphetho…
Online Reporter