Online Reporter
Ugwalo lulotshwe nguJ Sibanda (Mzila)
Ludindwe YiCollege Press
Umdlezane utshona endlini ephuma phandle ngokuya chitha kuphela. Ukuphuma kwakhe phandle kulawulwa yisalukazi esimongayo. Siyaphuma kuqala sihlole umumo phandle ukuze sisuthiseke ukuba akulamuntu wesilisa ozambona. Kungenzeka abekhona phandle siyamcela ukuba asithele.
Umdlezane uphuma embethe ingubo okuyiyona ayivunula nxa esendlini. Umdlezane kaphumi ngentuba yabantu bonke, udalelwa eyakhe yedwa. Impahla edlela umdlezane kayihlanganiswa leyomuzi wonke. Umdlezane uphekelwa yisalukazi esambelethisayo kuze kwenele inyanga ezintathu.
Umdlezane ulala laso isalukazi esambelethisayo. Okuvamileyo yikuba ukhulu ebulalele umdlezane okulizinyane ukuze azuze isitshebo adle aqine. Angadla, ugeza izandla, abesegcoba ingalo lembala ngamafutha asalele ezandleni.
Lokhu kuyisibonakaliso sokuba ucoliwe. Usane lwakhe luthelwa inyongo yaleyombuzi phezu kwenyawo laphezu kwezandla.
Ukusebenza komdlezane nxa esephumela phandle kulemcingelo ethile. Ilungelo lokusebenzisa ingiga ukuzuza ngokugigiswa yisalukazi esambelethisayo.
Sibopha ingiga ngengxoza besesibambisana lomdlezane umgigo, kugigwe inqobo yini esengigeni. Kwenziwa izaba nje kube kuphela.
Okunye okuba lomcingelo yikutheza lomdlezane. Mhla etheza inkuni zakuqala ukhangelelwe ukuba eze lemyaba embili, owakhe lowosane. Owosane uba ngowesalukazi ukuze sizuze inkuni zokuba sizibasela.
Impilakahle yomdlezane igxajelelwa ngokuthotshwa umzimba wonke ngamanzi atshisayo ukuze igazi lichitheke lingaze lahloba. Umzimba wakhe wangasese uhlaliswa emanzini alamaxolo omganu. Lokho kwenzelwa ukuba inyama zakhe zidonseke zibuyele esimeni sazo sansuku zonke. Uyabotshwa njalo isisu ngeqhele ukuze sibhodlakale, sibuyele esimeni sodalo lwaso.
Imicingelo yosane
Usane alukhitshelwa phandle kungakathwasi inyanga yokuqala luzelwe. Lugcinwa endlini inyanga ize ithwase. Mhla ithwasayo siyaluthatha isalusakazi siphume lalo phandle, silutshengise ucezu lwenyanga sisithi: “Nanguyana umnakwenu”
Abantwanyana bavunyelwa ukubona usane kusukela mhla luthunqiselwayo. Umdlezane uyabelaphela ngaphansi kwezinyawo ukuze zingadabuki.
Uthatha inhlabathi yalapho okwabekwa khona umnakwabo alucombe ngaphansi kwezinyawo. Ngemva kwalokho bayalutshengiswa usane.
Usane aluvulwa ebantwini besilisa lungakalungiswa ngokugcotshwa ngenhlabathi ethethwe esikhundleni somvundla. Lugcotshwa ngayo umzimba wonke. Lokhu kwenzelwa ukuthi nxa lukhangelwa ngumuntu wesilisa lungethuki beseluncipha umzimba.
Ngensuku umdlezane esezibini, izalukazi zekhaya ziyaluhlola usane ukuze zisuthiseke ukuba ngolwazo. Ziqaphelisa kakhulu imidwa yezandla.
Kukholwa ukuba imidando yesandla sokudla ifana xathu leyakwabo ayise womntwana. Eyesandleni sokhohlo kukholwa ukuba ifana leyakwabo kanina.
