Online Reporter
Ethel Ncube
ZISELE zibambe owangaphansi izakhamizi zeChiredzi kulandela ukuthutsha kwabantwana ababili bethwele ingwenya bethi yibo abayibuleleyo ngeviki ephelileyo.
Izakhamizi zimangele sezibona abantwana laba omunye oleminyaka engu-8 lole 9 sebefika ekhaya behudula umntwana wengwenya. Okhekhe laba kubikwa bafike ngekhaya beziqhenya ngokuthi bona bazingqwele ngoba babulele inyamazana ebizakhula icine ibulala abantu. Bathe bebuzwa ngabakwenzileyo abantwana laba bathe ingwenya ezinengi zandise ukubulala abantu kungakho bakubone kufanele ukuthi bangene emanzini bayibambe andubana bayigande ngamatshe ife.
Omama bakulindawo besebethwele izandla emakhanda becabanga ukuthi ngabe kuthutshe ezinye ingwenya ezinkulu ngesikhathi abantwana bekhipha le encane emanzini bekuyaba yisililo esiqintini.
Abantwana laba kubikwa bebevela dlala ibhola lenyawo enkundleni eseduze lesifula lesi okuyilapho ababone khona ingwenya.
Bathe besedlula babona ingwenya le isemanzini basebenakana ukungena bayikhiphe emanzini. Bathatha amatshe bayikhanda ingwenya le yaze yafa. Bathe sebebona ukuba isifile bayiphakamisa bahamba layo ngekhaya ngenhloso yokuyatshengisa abazali babo ngekhaya.
Abadala batshayele abogatsha olubona ngenyamazana zendle ucingo ukuze babuye bazothatha ingwenya le.
Intatheli ixhumane lomsekeli wesikhulumi samapholisa eMasvingo uAssistant Inspector Masauso Patinyu obike ukuba kuliqiniso ukuba abantwana ababili babulele ingwenya.
“Abantwana laba ngabafana ababili akade bevela dlala ibhola bathi sebebuyela ngekhaya babona umntwana wengwenya esifuleni bamthatha bamkhanda ngamatshe waze wafa.
“Sebebona ukuthi isifile ingwenya le bahle bayithwala bayisa ekhaya bethi bafuna ukuyatshengisa abazali ekhaya. Umntwana wengwenya lo uthethwe ngababona ngezinyamazana,” kuphetha uInsp Patinyu.
