Online Reporter
Fungai Muderere
UKUMANGALA kugubuzele ezenguqu eZimbabwe kulandela ukutshiya umsebenzi kukaMarian Marinica njengomqeqetshi omkhulu wamaWarriors.
Inhlanganiso yeZimbabwe Football Association (Zifa) iqinisekise ukuphuma kukaMarinica emsebenzini ngoMvulo.
I-Zifa iveze ukuthi yamukele isicelo sikaMarinica sokutshiya umsebenzi ngezizatho zakhe.
“Sifisa ukubonga umqeqetshi uMarinica ngomsebenzi awenzileyo kumaWarriors. Njengenhlanganiso, simfisela okuhle kodwa kumisebenzi yakhe kwelakusasa,” kutsho iZifa kusitatimende.
Kusenjalo, uKaitano Tembo usebekwe ukuba abe ebambe isikhundla sokuba ngumqeqetshi wamaWarriors njalo kukhangelelwe ukuthi ahole iqembu lisiya kumqhudelwano we-Unity Cup e-United Kingdom.
Uzancediswa nguTakesure Chiragwi okhethwe ukuba ngumsekeli kamqeqetshi.
Njengoba amaWarriors ezama ukuhlaliseka, uTembo uhle wafakwa esihlalweni esitshisayo njengomqeqetshi wesikhatshana ngaphambi komdlalo obalulekileyo we-Unity Cup e-United Kingdom. Esekelwa uChiragwi, wonke amehlo azobheka ukuthi lobu budlelwano obutsha bezobuchwepheshe bungakwazi yini ukulungisa isimo lokuhola iqembu lesizwe phakathi kwesikhathi esinzima.
Umhlaziyi wezemidlalo, uIsaac Mpofu kazange atshaye inja efihla umphini:
“Lokhu kunzima kakhulu! AmaWarriors aya kumqhudelwano obalulekileyo kodwa engahlalisekanga. Kulomsebenzi omkhulu kuye wonke umuntu osebhentshini labaqeqetshi.”
Umhlaziyi wezemidlalo uDalubuhle Bhebhe laye ukhuthaze abadlali ukuthi bazimisele andubana aveze ukuba akulandlela abangazivikela ngayo nxa bengasenzanga kuhle.
“Akusela kucatsha ngomunwe. Abadlali kumele badlale ngobuqotho baphakamise ilizwe futhi baveze ukuthi bangathola imiklomelo emihle kungakhathalekile ukuthi ngubani umqeqetshi.”
Abalandeli beqembu lesizwe, bakhangele ngelokhozi ukuthi kambe iqembu lesizwe linganqoba na kumbe linganqotshwa.
IZimbabwe izancintisa kumqhudelwano ye-Unity Cup 2026, okungumqhudelwano wamazwe amane ozabakhona kusukela mhlaka 26 kusiya ku-30 Nkwenkwezi eThe Valley eLondon.
Lumqhudelwano uzahlanganisa amazwe abalisa iZimbabwe, iNigeria, iJamaica kanye le-India, okuyikubunjwa kwembali, kubadlali bamaWarriors abazadlala eNgilandi kumqhudelwano waloluhlobo okokuqala.
“IZimbabwe izabhekana leNigeria kumdlalo wokuqala we-semi final mhlaka 26 Nkwenkwezi, kuthi iJamaica idlale le-India mhlaka 27 Nkwenkwezi. Imidlalo yomibili izaqala ngo-7.30 ebusuku, kanti abazanqoba bazaqhubekela kumdlalo wama-final mhlaka 30 Nkwenkwezi.
AmaWarriors aya kulo umqhudelwano elokuzethemba kulandela ukudlala kuhle kuMukuru Four Nations Tournament eBotswana, lapho abadlale kuhle kumidlalo lelizwe leBotswana, iZambia leMalawi.
UMongameli weZifa uNqobile Magwizi uchaze lumqhudelwano ozayo njengomqhudelwano omkhulu futhi obalulekileyo kwezemidlalo eZimbabwe.
“IUnity Cup iyisikhathi esibalulekile ebholeni leZimbabwe. Kuveza isifiso sethu sokuncintisa, ukukhula kanye lokuzihlola ezingeni eliphezulu lamazwe,” kutsho uMagwizi.
Ukaputeni weqembu, uMarvelous Nakamba ukholelwa ukuthi iqembu selikulungele ukuphakama kulesi sikhathi.
“Kuhlale kuyinhlonipho ukumela iZimbabwe, futhi ukudlala eLondon phambi kwabalandeli bethu abaphetsheya kwenza lesi sikhathi sibe ngesikhethekileyo kakhulu,” kutsho uNakamba.
I-Zifa isinxuse izizalwane zakuleli ezise-United Kingdom lakwezinye indawo ukuthi zisekele iqembu lesizwe kulo mqhudelwano womlando, kanti amathikithi ayatholakala ku-inthanethi kusukela ku-£18.
