admin
Cornelius Luphahla
ZIMADOLO nzima izakhamizi zesigabeni sakoSigola bucwadlana ledolobho lakoBulawayo kulandela ukuzwa ngesinye isakhamuzi ebesigcine indwangu esayithatha eChipinge esibangele ukuthi umuzi wayo uchitheke.
Kubikwa uMnumzana Maweni Sibanda wadinga indwangu le ngenhloso yokuziqinisa kanye lokuthi athole inotho kodwa ibisiphenduke isitha sakhe nanko phela kucatshangelwa ukuthi yiyo eyaphendula umntanakhe waba ngumkhoba ngemva kokunyamalala njalo useze esesele yedwa sewabalekelwa ngabantwana.
Kubikwa indwangu le ibanjwe kumaviki amabili adluleyo ngabaphurofethi abahlahlula endaweni le.
Kuzwakale ukuthi indwangu le ibisebenza ukuthatha ukudla lemali kwezinye izakhamizi kanye lezitolo ikuletha kuMnu Sibanda ngenhloso yokumnothisa. Kucatshangelwa njalo ukuthi indwangu le ibiphenduka ibe ngumuntu ebusuku imsize kwezocansi njengoba nje ubesehlala yedwa.
UMthunywa uxhumane lesinye isakhamuzi sakule indawo uMnumzana Shayne Nkala ochaze ukuthi laye wayekhona mhla kukhitshwa indwangu le kulesisakhamuzi.
“Lokhe ngakhotha udengezi lwedubha kangizake ngimbone umuntu olesibindi sokufuya inyamazana enjeya, abantu bagangile sibili phandle lapha. Abaphurofethi laba bathe bekhipha indwangu le uSibanda wazivumela ukuthi ngeyakhe njalo uyisebenzisa ukumqinisa.
“Isimanga yikuthi indwangu le ukuze iphume ithe ifuna ukukhungwa nge$5 yakudala elabantu abagigayo ngoba yathengwa ngayo eChipinge,” kutsho uMnu Nkala.
Kubikwa indwangu le yaphinda njalo yaveza ukuthi ngeke ihambe yodwa nxa ingaphiwanga leyo$5 izahamba lomnikazi.
“Indwangu le yaveza ukuthi ingabulawa ingakhungwanga lomnikazi kasoze aphile kungakho uSibanda wathwala nzima ebhoda esigabeni edinga imali le eyayifunwa yindwangu yakhe waze wayithola kwesinye isakhamuzi, lakho eseyithenga,” kutsho uMnu Nkala.
UNkosazana Siphethangani Mlala oyisakhamuzi sakule indawo ubikele intatheli ukuthi uMnu Sibanda wathi ebuzwa ngendwangu le wathi wayithenga engazi ukuthi izamhlupha.
“USibanda wathi ebuzwa ngendwangu le wathi yena wayithenga kungasondwangu kuyimpande yokumnothisa.
Wathi okwamanje uzwa ubuhlungu ngoba abaphurofethi sebekuvezile ukuthi indwangu le yiyo eyamcatshisela umntanakhe yamphendula waba ngumkhoba.
“Wabuya wathi okunye okumzwisa ubuhlungu yikuthi indwangu yakhe le simxotshele imuli yakhe, ihlala imtshaya seze engasazwisisani lemuli yakhe njalo sehlala egula,” kutsho uNkszn Mlala.
Imizamo yokukhulumisana loMnumzana Maweni Sibanda yehlule ngoba ucingo lwakhe lwalile ukungena.
Induna yakule indawo uMnumzana Zephania Sigola ebuzwa ngale indaba uchaze ukuthi laye wakuzwa noma nje wayengekho.
“Indaba le ngayizwa ngendlebe kodwa kangizange ngayibona ngamehlo. Noma kunjalo kuliqiniso lokhu ngoba abantu ngeke bakhulume amanga njalo abaphurofethi laba bayasebenza kakhulu ngoba kunengi asebekwenzile,” kuphetha induna uSigola.
Online Reporter