adminYintatheli kaMthunywa
SINGUNDABAMLONYENI isenzo somunye umfelokazi wesigabeni seSinangeni eZhombe bucwadlana ledolobho leKwekwe okubikwa ukuthi usehlala lamadoda amabili emzini womkakhe, uMthunywa uyakuveza lokhu ngokugcweleyo.
Umfelokazi lo uSolizaranyika Mpofu owaziwa ngokuthi nguNkosikazi Shamhu ohlala ngaphansi kukaSobhuku uSitshonile ngaphansi kwenduna uNtabeni kubikwa usethethe isithembo samadoda uSimbarashe Sibanda loThabani Mpala, isenzo esesibangela ukungunguna phakathi kwezakhamizi njengoba zingakaze zikubone okunje.
UMthunywa uxhumane loMthabisi Mpofu ongumakhelwane kamsolwa yena obike ukuthi njengezakhamizi lanxa kungabamangalisi okwenziwa nguShamhu kodwa isithembo kwaziwa ukuthi sithathwa ngobaba hatshi omama.
“Akusimangalisi thina lokho laloba kusizwisa ubuhlungu ukuthi amadoda la omabili adliswa yikho nje engaboni cala ngokwenda kwawo kumama lo.
“Ensukwini ezidlulileyo ubethandana lomntwana olingana lecinathunjana lakhe khathesi usethethe isithembo njalo lamadoda la uwaphatha njengomkakhe,” kutsho uMnu Mpofu.
UMthunywa uxhumane lomsolwa yena obike ukuthi indaba zomuzi wakhe kazifuni muntu njalo kasoze atshelwe okokwenza ngabanye abantu ngoba uleyakhe imithetho elandelwa yilabo abahlala laye.
“Mina ngenza okuthandwa yinhliziyo yami emzini wami, kanti lina lifuna ngibaxotshe yini laba bantu nxa bengilanda emzini wami.
“Lami ngiyamfuna umsizi ozangijabulisa, lami ngilemizwa njengaye wonke umuntu njalo kuyinto eqondileyo ukusiza abantu abadubekileyo,” kutsho uNksz Shamhu.
UMthunywa uxhumane njalo loSobhuku uPrimrose Khanye okuvumileyo lokho njalo waveza ukudana ngesenzo lesi ethi silihlazo esigabeni.
“Indaba okhuluma ngayo yomfelokazi olamadoda amabili siyayazi kodwa lokhu kuyasiyangisa njengesigaba kodwa njengenkokheli sisazama ukuthi silungisise udaba lolu ngoba kuyinto efuna ukulungiswa,” kutsho uSobhuku uKhanye.
Online Reporter