admin
Cornelius Luphahla
INHLANGANISO ekhangela ngokugcinwa kwezemvelo iForestry Commission isithembise ukuncedisa izakhamizi ezingaphansi kwayo ukwakha izikolo zemfundo yaphezulu ngenhloso yokuthuthukisa imfundo kulezizigaba.
Kuzwakale ukuba indawo ezinengi ezikhangelwa yinhlanganiso le bezingela zikolo zemfundo yaphezulu ngoba ibingavumi ukuthi zakhiwe.
UMthunywa uxhumane loMkhokheli jikelele weForestry Commission wesabelweni seMatabeleland North uMnumzana Armstrong Tembo wachaza ukuthi noma nje ekuqaleni kwakungavunyelwa ukwakha izikolo endaweni ezingaphansi kwayo kodwa khathesi sokuvunyelwa.
“Ekuqaleni kwakungavunyelwa ukuthi indawo ezingaphansi kohlangothi lweForestry Commission zakhe izikolo ezinengi kodwa khathesi sesibone kungcono ukuthi zakhiwe ngenxa kokusilela kwezikolo. Sinanzelele njalo ukuthi abantwana bezisebenzi zeForestry Commission basuka bathwale nzima labo ngokuhamba umango omude besiya esikolo ikakhulu ezemfundo yaphezulu.
“Uhlupho lolu luvame kakhulu eNkayi kanye leLupane. Yikho-ke khathesi silesikolo esesincedisa ukuthi sakhiwe eGwamba eNkayi,” kuchaza uMnu Tembo.
UMnu Tembo uqhubekele phambili waveza ukuthi ubukhatshana bezikolo budala ukuba abantwana bengaphumeleli ezifundweni zabo.
“Ubukhatshana bezikolo bubangela ukuthi abantwana bengaphumeleli ezifundweni zabo, okusuka njalo kudale ukuba inhlanganiso yethu iswele abantu bokuqhatsha,” kutsho uMnu Tembo.
Kuzwakale ukuthi ngemva kokuba inhlanganiso le ithembise ukuvumela ukwakhiwa kwezikolo kulezindawo izakhamizi lezi sezihle zaqala ukwakha izikolo. Okwakhathesi izikolo ezakhiwayo yiMafa Secondary School eseLupane kanye leGwamba eseNkayi.
Online Reporter