admin
UMDENI womhlabeleli we-reggae ongasekho emhlabeni uLucky Dube udinwe ubhodla umlilo ngabantu abasebenzisa igama lalumculi ukukhulisa amabhizimusi abo.
Ngokutsho kweSunday Sun, umdeni walumculi usukhathele ngamankampani labantu abasebenzisa igama lakhe ngenhloso yokwenza imali.
Emasontweni ambalwa edluleyo izinkundla zokuxhumana zazintwiza ngesikhathi uhlelo lwakumabonakude oluyintandokazi kuleli i-Our Perfect Wedding kuvele ukuthi imota yalumculi isiphenduke i-limousine kanti futhi manje isisetshenziselwe imicimbi eyikhethelo.
Indodana kaLucky, uThokozani utshele abephephandaba ukuthi kwamcaphula ukubona umnikazi wemota echoma kumabonakude.
“Lababantu bayithenga imota — akusesiyo kababa wami. Kungani besebenzisa igama lakhe ukuyikhangisa?’’ kubuza uThokozani.
UThokozani uphinde wathi ngamuva nje usanda kuthukutheliswa yindawo yokucitsha ukoma eGoli ebilomcimbi wokumhlonipha.
Kuzwakale ukuthi umdeni ubungazi ngalomcimbi, bazi ngawo emgwaqeni sebebona ezingqwembeni zokusakaza kanti kuyinto abayithathela phezulu.
“Labantu abakaze baxhumane labomdeni ngento efana lale. Kuyasimangalisa njalo kuyasethusa ukuthi kulabantu abafuna ukwenza imali ngegama likababa,phezu kwalokhu bengasitshelanga thina njengomdeni. Angihambisani laloluhlobo lokuziphatha kwalababantu abangosomathuba abaholwa yimali yobugovu,’’ kutsho uThokozani. — Ubulembu
Online Reporter