admin
AKE sikhumbuzane: Sikutshilo kuviki ephelileyo ukuthi asekhona amanye amabizo angaba ludubo ekwakheni isinciphiso. Lawo yilawo alondebembili kumbe unsinini elungeni lokucina. Lowo ndebembili kumbe unsinini uguquka abe ngulwangeni anduba kujotshelelwe isijobelelo sesinciphiso u –ana ngemva kokususa unkamisa wokucina webizo.
Nansi inguquko yabondebembili labonsinini besiba ngolwangeni: Undebembili p (popo) ubangulwangeni tsh (ipotshana) – p > (ipopo) > tsh (ipotshana). Undebembili ph (impuphu) ubangulwangeni tsh (imputshana. Ezinye izibonelo zenguquko yabo ndebembili besiba ngolwangeni yilezi: bh (isigubhu) > j (isigujana), b (inkabi) > tsh (inkatshana), m (insimu) > ny (insinyana, mb (imbambo) > nj(imbanjana), mp (impompi) > ntsh (impontshana).
Unkamisa wokucina webizo uyasuswa indawo yakhe ithathwe yisijobelelo sesinciphiso u – ana.
Nansi inguquko yabonsini besiba ngolwangeni: d (idada) > j (idajana), nd (iqanda) > nj (iqanjana), th (umuthi) > tsh (umutshana), t (ikati) > tsh (ikatshana), nt (umkhonto) > ntsh (umkhontshwana), n (umkhono) > ny (umkhonywana).
Nanzelela ukuthi ondebemmbili kabangwaqazisi nxa besiba yizinciphiso noma ngabe amabizo akhona acina ngo o- kumbe –u.
Akhona amabizo alabondebezinyo -f- lo -v- elungeni lokucina. Wona kawangwaqazisi unkamisa wokucina angazabe ngu –o loba –u, kodwa amane amsuse lowonkamisa wokucina abesejobelela isijobelelo sesinciphiso u –ana. Izibonelo: isifo > isifana – isif(o) + ana > isifana, isifu > isifana _ isif(u) + ana > isifana, imvu > imvana – imv(u) + ana > ana, inkovu > inkovana – inkov(u) + ana > inkovana.
Online Reporter