admin
Wayne Ncube
ABALIMI sebexwayiswe ukuba bangasebenzisi imvundiso kakhulu ezilinyweni ngoba zingaphambanisa ukukhula kanye lesivuno sabo.
Ekhuluma lentatheli kaMthunywa uMnumzana Jabulani Ncube onguAgronomist kunkampani yeSeedCo uthe njengoba izulu lingazange line ngendlela ebelikhangelelwe ngayo, abalimi bakhuthazwa ukuba bangasebenzisi kakhulu imvundiso yesikhiwa ngoba ilakho ukutshisa izilimo ingaba nengi.
“Ifethalayiza kumele isetshenziswe kakhulu nxa izulu lilinengi ngoba iyavikela ukutota kwezilimo kukanti ingasetshenziswa lapho okungelazulu elinengi izilimo ziyatsha.
“Ifethalayiza kwesinye isikhathi iyabulala ukudla komhlabathi kube sekusenza ukuthi izilimo zingakhuli ngendlela ngoba zingaselakho ukudla. Okunye njalo ingafakwa endaweni engelamanzi amanengi iyabulala impande zesilimo kube sekusenza ukuthi isilimo sehluleke ukumunya amanzi besesisifa,” kuchaza uMnu Ncube.
Ubuye wathi umvundiso womquba ungcono kulokusebenzisa ifethalayiza ngesikhathi kulezulu elincane.
“Umquba ungcono ngoba uyavuma lanxa izulu lililutshwana kodwa ifethalayiza ihle itshise izilimo ngoba iyabe isibulele imvundiso yonke esenhlabathini,” kulandisa uMnu Ncube.
Uphethe ngokuthi abalimi abanengi bagijimela ukusebenzisa ifethalayiza lalapho okungamelanga isebenze khona.
“Ukuthi ifethalayiza ingafakwa ezilinyweni zenza kuhle akutsho ukuthi kumele ifakwe loba kanjani kodwa kudingeka ukuthi isetshenziswe ngabalimi nxa izilimo zisengozini yokutota.
“Nxa ungayifaka ngesikhathi esingafanelanga ulakho ukulahlekelwa yisivuno esihle ngoba iyabe ingasasebenzanga ngendlela,” kuphetha uMnu Ncube.
Online Reporter