Online Reporter
Nkosilathi Sibanda
KUSAZOBA mnandi kwezomculo koBulawayo ngokuphenduka kohlelo lweFriday Live at Amakhosi.
Uhlelo lolu luphenduka ngemva kweminyaka lwacina ukuqhutshwa. Inengi labathandi labalandeli bezomculo kuleli, bakhumbula iFriday Live at Amakhosi iphuma kumabonakude kuZBCtv ngoLwesihlanu maviki wonke.
Kwaku yinkundla lapho okwakuqhunsa khona abaculi abatshiyeneyo njalo kukhangelelwe ukuthi kuqhubekele phambili kubemnandi njengakudala.
Mhlaka 1 Ncwabakazi kuzaqhunsa uRamsey K. NgoLwesihlanu oluzalandela, mhlaka 8, inkundla zivuthiswa nguMahlaba kuthi uGogo uBekezela kukhangelelwe ukuthi ajabulise abantu mhlaka 15, eMakhosi Cultural Centre.
Inkundla le kukhangelelwe ukuthi ivuselele ezomculo koBulawayo lokunikeza abaculi ithuba lokuthi basondelele abantu, kube lokuthakazelelwa kwamathalenta, ubungcitshi lamasiko akuleli.
I-Friday Live at Amakhosi yasungulwa ngumuyi uCont Mhlanga.
Ekhuluma lephephandaba likazulu, omunye wabaculi abazavula indlela kuFriday Live at Amakhosi, uMahlaba uthe:
“Kade salinda ukuthi koBulawayo kube lohlelo lolu, sekwenzakele. Siyakubonga lokhu ngoba lithuba elizaphakamisa abaculi bethu, labantu bajabule. Mina ngizahlabela mhlaka 8 Ncwabakazi lapho engizakwethula ingoma zami ezithandwa ngabanengi, ngiphinde ngibethulele ezinye abangazaziyo. Siyabonga ngokuphenduka kweFriday Live at Amakhosi.”
Umlandeli wemiculo koBulawayo uDanisa Mkhwananzi, ohlala eMagwegwe uthe nxa kukhulunywa ngeFriday Live at Amakhosi, kumkhumbuza kudala.
“Kwakumnandi ngesikhathi lesiya uCont Mhlanga esakhona kuFriday Live at Amakhosi. Sasisuka khonale eMagwegwe siyetshona eMakhosi sijabula, size siphenduke emakhaya ebusuku. Kwakungela enye indawo esasingaya kuyo ngaphandle kokuthi sidinge imota siye lapho.
“Ngiyethemba ukuthi njengoba kuthiwa isiphendukile i-Friday Live at Amakhosi, sizakholisa ukwedlula iminyaka yakudala. Loba sengikhulile iminyaka yokuzalwa, ngizahamba kuphela. Ngifuna ukuyakwejisa ngibukele ikakhulu abaculi lamaqembu e-jazz lemarabi.”
