Vusumuzi Dube
Nkosilathi Sibanda loMthabisi Tshuma
ABADALA bathi sibusisiwe esiphayo!
Isitsho lesi sigcwaliseke esigabeni seBulilima kulandela ukunikezwa kwempuphu efika amathani amahlanu kuzakhamuzi zakulindawo.
Isipho lesi, esinikezwe kuzakhamuzi zika-ward 14, esiqintini seMalalume, sivele kunhlanganiso yeTzu Chi Foundation kunye lakunkokheli zepolitiki eBulilima, ngaphansi kwebandla elibusayo iZanu-PF, uDokotela Evelyn Ndlovu loDingumuzi Phuti.
UDkt Ndlovu unguMphathintambo wogatsha lweMvelo, Umkhathi lenyamazana zendle kuHulumende. UPhuti ungumsekeli kaMphathintambo wogatsha lwe-Information Communication Technology.
Impuphu le iphiwe imizi eyedlula i-500 njalo incede kakhulu imuli lezi ngesikhathi zilungiselela ukuqala komnyaka lokuvulwa kwezikolo.
Andubana kuqale ukuphiwa kwempuphu, izakhamizi zibe yingxenye yohlelo lokuhlanyelwa kwezihlahla, olukhokhelwe nguDokotela Ndlovu lomqondisi wenhlanganiso yeTzu Chi Foundation uChin Chai Chu.
Kulumbuthano bekulenduna uMadlambuzi kunye lamalunga ebandla leZanu-PF.
UDkt Ndlovu wethule amazwi okubonga kuMongameli Mnangwagwa leTzu Chi Foundation.
“Isipho lesi size ngesikhathi esifaneleyo, siphakathi kokuthakazelela umnyaka omutsha lekhefu leKhisimusi. Sibonga lomusa weTzu Chi Foundation,” kutsho uDkt Ndlovu.
UPhuti uthe: “Lesi yisibonakaliso sokuzimisela kukaHulumende kunye lenhlanganiso ezisebenzela umphakathi ekuguquleni impilo zabantu.
“Inhloso yikuqhubeka ngombono kaHulumende loMongameli Mnangagwa wokuthi sifike umnyaka ka2030, ilizwe selikhuphule umkhonomi owakhiwe ngabanikazi balo.”
Online Reporter