admin
Thokozile Mbedzi
KULENDODA yesigabeni seGlengary, eFort Rixon ebulele enye ebisebenza layo kulandela ukuxabana ngesikhathi besebenza emasimini andubana layo izibophele.
Umetheswacala uMayibongwe Mathe oleminyaka engu-19 kubikwa uhlahlele uMoment Ncube oleminyaka engu-22 kubangwa ukulima insimu kaNkosazana Jessy Mpofu oleminyaka engu-82 akade ebaqhatshile kuviki ephelileyo.
Ekhuluma lentatheli kaMthunywa uMedeline Sibanda uthe abafana laba benze inkemenkeme yendaba kubangwa umsebenzi.
“Ugogo uMaMpofu ubeqhatshe abafana laba ababili ukuthi bamlimele engazi ukuthi sezithezele olulenkume.
“Uthe esesiyanika izisebenzi lezo ukudla yikho lapho ahlangane khona lenkalakatha yendaba le. Uthe efika emasimini wathi ethi mehlo suka wabona uNcube elele phansi ebububula wahle wabeka phansi ukudla wayakuye wafica ephakathi kobuhlungu.
“Wahlaba umkhosi omakhelwane bagijima bayamncedisa ukumthwalela esibhedlela lapho afika wadlula khona ngesikhathi esamukelwa,” kutsho uNkszn Sibanda.
Uqhubekele phambili esithi uMathe wathi esizwa ukuthi uNcube kasekho laye wayazibophela etshiya ihloka ayelisebenzise ukuhlahlela ngalo uNcube eceleni kwakhe lilokhu lilegazi.
Isikhulumi samapholisa esabelweni seMatabeleland South uInspector Loveness Mangena ebuzwa ngodaba uthe solufikile ehofisini yakhe.
“Udaba lwamadoda amabili asuke alimazana omunye walimala wabhubha esanda kufika esibhedlela umetheswacala laye wazibophela solufikile ehofisini yethu,” kuphetha uInsp Mangena.
Online Reporter