Online Reporter
Nkosilathi Sibanda
ABATHANDA umculo, amasiko lokuzilibazisa bazathola elinye ithuba lokuzithokozisa kumkhosi weMakokoba Music Festival ozaqhutshwa eFusini, eMakokoba.
Umkhosi lo, ohlelwe ngaphansi kwendikimba ethi: “Home Grown” uzaqhutshwa mhlaka 18 kusiya ku-19 Mpandula, uzahlanganisa umculo, amasiko, ukudla, ezokuzilibazisa lamabhizimusi amancane.
Kukhangelelwe ukuthi esitikini kuqhunse abaculi abedlula abalitshumi abazasukumisa uzulu ngobunandi phakathi kwensuku ezimbili. Ngokuphawula kombiko ovezwe ngabaqoqi bomcimbi, abaculi labalibazisi abazakuba khona kulumkhosi kubalwa uBhila, Charles Mahlaba Banda, Mxolisi Mr Bones, Godolude, Hwabarathy, Clement Magwaza, Mlambo Express Band, Insimbi ZeZhwane loDr Gasolo.
Ukukhethwa kwabaculi abavela endaweni ezitshiyeneyo kunika umkhosi lo ithuba lokuhlanganisa abathanda imihlobo yomculo ehlukeneyo, kusukela kumculo wesiNtu kusiya kumdumo wakulezinsuku.
UBhila usebikele abalandeli bakhe, ebanxusa ukuthi babe yingxenye yalumkhosi.
Ngokuhlanganisa umculo, amasiko, ukudla, abantwana lamabhizimusi, iMakokoba Music Festival ilindelwe ukuthi ibe ngomunye wembuthano ezadonsa abantu abanengi eMakokoba ngoMpandula.
