Online Reporter
YiNtatheli kaMthunywa
KUBOTSHWE indoda eleminyaka engamatshumi amathathu lasitshiyagalolunye (39), uGoodwell Kamunda, ngemva kokusolwa ngokubulala intombi yayo, uFelina Kazembe, kubangelwa yikuthukuthela ngenxa yobukhwele emzini wabo eChiendambuya.
Ukuhlasela lokhu kwenzakale mhlaka 2 Zibandlela, ngemva kokuba uKamunda ethole ukuthi uKazembe ulethe omunye umuntu wesilisa, uBlessing Charwadza (26), emzini wakhe.
Ngokutsho kwemithombo, uKazembe watshiya uKamunda ezitolo waseqhubana loCharwadza belubhekise emzini wakhe bafika balala emkulwini.
Ngemva kwesikhatshana phakathi kwalobobusuku, uKamunda wangena endlini walala eceleni kukaKazembe, engazi ukuthi uCharwadza laye ulele khonapho.
Kubikwa khonokho nje kwangena unina kaCharwadza ezothatha indodana yakhe, okwenza uKamunda wahle wathukuthela.
UKamunda waxotshanisa uCharwadza, kodwa wehluleka ukumbamba.
Wabuyela emkulwini wafika wadobha isikhuni watshaya uKazembe ngesihluku, emtshaya ngokuphindaphindiweyo emzimbeni wonke.
Omakhelwane bezwa ngalokhu ngemva kokuba uKamunda ngokwakhe ebatshele ngesiga lesi, njalo amapholisa abizelwa endaweni yesehlakalo. Wabotshwa ngemva kwesikhatshana.
Imithombo iveze ukuthi ubudlelwano bukaKamunda loKazembe bebuvele bumunyu nanko phela bebevele bengathembani njalo bengazwani.
UKamunda uvele phambi kukamantshi womthethwandaba weRusape, uNkosazana Barbra Mateko, ebhekane lecala lokubulala ngaphansi kwesigaba 47(1) soMthetho Wobugebengu (Codification and Reform) Act (Isahluko 9:23), esenza ukubulala okungekho emthethweni kube licala.
UNkosazana Mateko kazange amcele ukuthi aphendule, njalo wamlayela ukuthi afake isicelo sebheyili eHigh Court.
Umsolwa uvalelwe esitokisini kuze kube mhlaka 26 kuZibandlela ukuze kuqhutshwe icala lakhe.
Ummeli, uNkosazana Faith Mutukwa utshele inkantolo ukuthi uKamunda uhlasele uKazembe ngaphandle kokukhetha, wamlimaza kakhulu emzimbeni wonke njalo waqondisa ukuhlasela kwakhe ezithweni zakhe zangasese.
“Mhlaka 2 Zibandlela 2026 eMwendazviuya Village, eChiendambuya, indawo engaphansi kwenkosi uMakoni, uGoodwell Kamunda wahlasela ongasekho emhlabeni, uFelani Kazembe, ngogodo kanye lento ebukhali engaziwayo ekhanda, emlenzeni wesandleni senxele kanye lomzimba wonke.
Umuyi walimala kakhulu ebusweni, ekhanda, ezithweni zangasese ezazisopha igazi, kanye lomlenze wenxele owephukayo,” kutsho uMutukwa enkantolo.
Ugodo olulegazi, okuthiwa lwasetshenziswa ngumsolwa ukuhlasela umuyi, lwatholakala.
