admin
UTINYIKO Gwambe ujwayele impilo egcwele izinkinga kodwa sewanqoba ezinengi, eyedwa nje.
Usethole uthando — njalo usethole usekelo.
Inkinga zakhe kazincane kodwa akekho yedwa. UTinyiko ubethatha izinkinga eziza empilweni ngesibindi esimangalisayo. Yiloba wazalwa engelazandla lenyawo, sowaguqula impilo yakhe wayenza elesizotha. Kusukela esenza imfundo yangaphansi ubezimisele ngemfundo yakhe. uTinyiko oleminyaka yokuzalwa engu-24 ukholwa ukuthi imfundo iyisiqokoqela kungakho usebenza gadalala ukuthi afeze amaphupho akhe mayelana ngemfundo.
Ukholwa ukuthi imfundo izathuthukisa impilo yakhe. Umdeni wakhe uhlezi uthatha amathuba okumnakekela njalo usekelo lwabo ludlale indima eqakathekileyo empilweni.
Impilo yakhe isiguqukile manje, nanko phela usethole isithandwa senhliziyo yakhe. UTinyiko usehlala lejaha lakhe Soshanguve Block R in Tshwane.
“Sengephulwa inhliziyo ngamadoda amanengi. Kodwa khathesi sengithole uthando lweqiniso.”
UTinyiko odabuka eTshilamba eVenda, Limpopo, ubikele iphephandaba leDaily Sun ukuthi ijaha lakhe uXolisa Makeleni (29), ahlangana laye kunkundla zokuxhumana umthanda enjalo.
UTinyiko wafika eTshwane ngomnyaka ka2014 waqala ikhosi ye-IT kodwa waseyitshiya waqala i-degree leSocial Development Policy ngo-2015 e-University of Pretoria. Waqeda leli-degree ngo2017.
Waqeda i-honours yakhe ngo-2018. Uyaqala i-masters lonyaka. Eqala ukuhlangana loXolisa mathupha eSunnyside, eTshwane, wayengelaso isikhathi sothando, wayezifunela ukubheka amabhuku akhe nje.
“UXolisa wangithola ngilenzondo enkulu, kodwa ngenxa yothando lwakhe nganakana ukuthi ngimuphe ithuba.
Wayeziphatha ngendlela etshiyeneyo. Wayengelamahloni okuhamba engibambe isandla kumbe ukungiqabula phakathi kwabantu.”
Bebefuna ukutshada nyakenye kodwa uTinyiko ubegula esehluleka ukuphefumula kuhle okwenyanga eziyisithupha.
Uthi angakuthakazelela ukuba labantwana abathathu. UXolisa watshiya umsebenzi wakhe ukuze abelesithandwa sakhe.
“Ngiqala ukuhlangana laye ngazitshela ukuthi udinga uthando njengaye wonke umuntu. Ngazinikela ukuba ngibe yisithandwa sakhe esithembekileyo. Ngeke ngivumele muntu ukuthi asehlukanise. Uyangihlanyisa uTinyiko,” utsho njalo.
Umngane kaXolisa uSindile Rawana (30) uthe wayengakholwa ukuthi umngane wakhe uthandana lomuntu okhubazekileyo.
“Khathesi ngiyalusekela uthando lwabo. Umngane wami usetshengisele ukuthi uyamthanda uTinyiko,” utsho njalo.
Udadewabo kaTinyiko uLufuno (34) uthe: “UTinyiko wakhula njengaye wonke umntwana, yiloba je wayelenkinga ezithile. Siyamjabulela nanko phela usethole uthando,” kuphetha uLufuno. -Ubulembu
Online Reporter