admin
Wayne Ncube
ABALIMI sebexwayiswe ukuthi bangene kubhizimusi lokufuya inyosi ngoba akukho nzima njalo inyosi zilakho ukulethela umlimi imali enhle.
Intatheli kaMthunywa ikhulumisane lengcitshi kwezokulima kunkampani yeZimbabwe Farmers Union uMnumzana Mkhumbuzi Siziba ophinda abe ngumlimi esabelweni seMatabeleland North okhuthaze abalimi ukuthi bafuye inyosi ngoba zilenzuzo enhle.
“Abalimi kabafuye inyosi ngoba kuyibhizimusi enhle engabalethela inzuzo engabaphilisa.
UMnu Siziba uthe inyosi ziyalungiselwa indawo lapho umlimi angazigcina khona ukuze athole uluju olunengi njalo oluhlanzekileyo.
“Abafuyi benyosi bayazilungiselela indawo zokuhlala kungaba ngumkolo kumbe amagabha njalo kufanele kube sendaweni elamanzi, umthunzi kanye lezihlahla ezilamaluba ukuze inyosi zithole ukudla okwaneleyo.
“Ngokunjalo kubalulekile ukuthi abalimi balandele indlela eqondileyo yokuzithapha ukuze zingafi kanye lamachaphazi,” kuchaza uMnu Siziba.
Uthe uluju lwenyosi luyatshiyana umbala kusiya ngokuthi zidla amaluba waphi kungakho olunye uluju lulombala ojiyileyo kodwa olunye lulombala okhanyayo.
UMnu Siziba uphinde waveza ukuthi umkambo wenyosi muhle ngoba uluju luthakazelelwa ngabantu abanengi njalo luyelapha imikhuhlane etshiyeneyo.
“Uluju lulomkambo omuhle kakhulu ngoba abantu bayaluthakazelela kakhulu.
“Okunye okwenza umkambo ubebanzi yikuthi uluju luyelapha imikhuhlane etshiyeneyo enjengophepha lemvukuzane ngakho umlimi ozifuyileyo kasweli umkambo,” kutsho uMnu Siziba.
“Abantu bengabakwazi ukuthi uthengisa uluju akuhluphi ngoba bayazibuyela ukuzothenga.
“Abafuyi benyosi akufanelanga bathele uluju amanzi kumbe itshukela ngoba kuyindlela yokufuya engavunyelwayo,” kuphetha uMnu Siziba.
Online Reporter