Vusumuzi Dube
Nkosilathi Sibanda
UMQONDISI omkhulu wogatsha lwe-Agricultural and Rural Development Advisory Services (Ardas) uNkosikazi Medlinah Magwenzi, uthe ilizwe likhangelelwe ukuthola isivuno esikhulu lonyaka ngenxa yezulu elihle elinileyo.
Uthe lokhu kudale ukuthi isivuno somumbu kunye lezinye izilimo sedlule isilinganiso ebesihleliwe phambilini.
Kumbiko awethule ngoLwesine ebulenjini, uNkkz Magwenzi uthe sekumele kugxilwe kakhulu ekwandiseni isivuno lokulondoloza izilimo, eveza njalo lokuthi kuqaphelwe lokhula.
“Abalimi bakhuthazwa ukuthi basebenzise ama-herbicides ahlanganiswe lama-wetters ukuze asebenze kuhle, njalo basebenzise ifethalayiza ngendlela ehlelekileyo ukuze bathole isivuno esiphezulu,” kutsho uNkkz Magwenzi kumbiko wakhe.
Uqhubekele phambili wathi abalimi kabahlale beqaphele lanxa izulu line kuhle, exwayisa ukuthi amanye amasimu angagcwala amanzi okungabulala izilimo. Uthe abalimi kumele bananzelele lokwanda kwezibungu ezifana lentethe.
UNkkz Magwenzi uthe kuqakathekile ukuthi abalimi bathathe amanyathelo masinyane okuvikela izilimo zabo.
Uqhubeke wathi abalimi basebenzise amacebo amatsha okulima afana lokwakha imifolo yokukhipha amanzi kunye lendlela ezihlelekileyo zokubulala izibungu, ngenjongo yokuvikela izilimo.
UNkkz Magwenzi uthe inhloso enkulu yikuthola isivuno esiphezulu, ukuqinisa isithunzi selizwe kwezokudla, lokuphuma ekwethembeni ukuphiwa izipho zokudla ngabanye abantu.
Online Reporter