Online Reporter
YiNtatheli kaMthunywa
Abe-National Social Security Authority (NSSA) sebethule isixwayiso esiqinileyo kulabo abahola impentsheni ukuthi bavuselele izithupha zabo zempilo ama-Life Certificates kumbe bangasaholi imali zabo.
Kusitatimende iNSSA ithe ukuvuselelwa kwezithupha zempilo zika2025 kuzaqala mhlaka 4 Ncwabakazi kusiya kuma kumhlaka 31 Mfumfu njalo ukwehluleka ukulandela isixwayiso lesi kuzenza ukuba imali zokuzincedisa zimiswe.
Ugwalo lweNSSA Life Certificate lunikwa labo abahola impentsheni yiNational Social Security Authority (NSSA) eZimbabwe, futhi luqinisekisa ukuthi basaphila njalo kumele baqhubeke behola impentsheni. Lokhu kwenziwa minyaka yonke ngenhloso yokuvikela ubuqili kunye lokuthi kuqhubeke kubhadalwa abantu asebafayo impentsheni.
“Labo abathola imali yomhlalaphansi kumele bavakatshele emawofisini eNSSA mathupha ezabelweni zabo, kumbe amanye amawofisini asendaweni yakibo bephethe izithupha kumbe ipasipoti. Ichence lokutshayela kalivunyelwa,” kuxwayisa iNSSA.
Kubikwa labo abagulayo kumbe abaphila lobugoga abangenelisiyo ukufika emawofisini eNSSA bazalandwa emzini yabo.
Ukuze kufinyelelwe abantu abanengi, i-NSSA izabuye imise amatende e-POSB, NBS kanye le-ZimPost ngezinsuku zokuhola impentsheni, kunye lakuma-growth points. Izinsuku lezo zizakwaziswa ngokuhamba kwesikhathi.
Abahola impentsheni abahlala phetsheya bangadawuniloda Isitifiketi Sokuphila ku-www.nssa.org.zw futhi uma sesiqediwe ukugcwaliswa saqinisekisiswa, basithumele nge-imeyili [email protected].
“Ukwehluleka ukuvuselela isethifikethi sempilo kusiyafika umhlaka 31 Mfumfu kuzabe kusitsho ukuba imali zomhlalaphansi zizamiswa.”
Ngaleso sizatho nxa ulokhu ufuna imali yakho yomhlalaphansi hamba emawofisini abo uyeveza ubufakazi bokuba usawadla amabele.
