Online Reporter
Mthabisi Tshuma
UMSAKAZO weStar FM uzakuba yingxenye kumsebenzi wokukhankasela ukulondolozwa lokufundiswa kwamasiko ngesikhathi kukhunjulwa iNkosi uMzilikazi lonyaka.
IStar FM, engaphansi kwenkampani yeZimpapers, yenze isivumelwano lenhlanganiso yeMthwakazi KaMzilikazi Cultural Association (MMCA), kulungiselelwa umkhosi lo ozabe umhlaka 5 kusiya ku 6 Mpandula, enkundleni yeKing Mzilikazi Memorial Site, eMhlahlandlela, eMatobo, esabelweni seMatabeleland South.
Indikimba yesikhumbuzo lonyaka ngethi: Siqoqa Isizwe Ngamasiko.
Kubikwa kuzakhokhela induna zomdabu ezikuzabelo zeMatabeleland ezigoqela uMathema, Dakamela, Fuyana, Matshazi, Mathe loMenyezwa.
Isikhulumi seMthwakazi KaMzilikazi Cultural Association uDr Gasolo uthe: Siyajabula ukulazisa ukuthi sibambisane le-Star FM njengomsakazi wethu kulesi sikhumbuzo salonyaka. Umcimbi lo uthembisa ukuthi uzakuba ngumgubho omkhulu ozaphakamisa ibizo leNkosi uMzilikazi. Wonke umuntu ukhuthazwa ukuba abe khona, kutsho uDr Gasolo.
Ekhuluma ngalobu ubudlelwano, umanenja weStar FM, uSteve Vickers, uthe lokhu kukhulu kulumsakazo njengoba beqhubeka ngokuthi bazwakale kuhle ngaso sonke isikhathi.
IStar FM, nyakenye isakaze yafinyelela kakuhle ezabelweni seMatabeleland lapho uBabongile Sikhonjwa, osebizwa ngokuthi nguye owaletha iStar FM koBulawayo, esethula uhlelo lwe-Afterdrive. Kuloluhlelo, yikho lapho esiqalise umkhankaso lo.
Kungo kwakuqala sibambisana lomkhosi onje eMatabeleland, okutshengisa ukukhula kwethu njengomsakazo. Sifuna ukuncedisa ukusabalalisa ulwazi ngeNkosi uMzilikazi, kutsho uVickers.
UDr Gasolo uthe amalungiselelo abo aqhuba kakuhle.
Ilanga lesikhumbuzo seNkosi uMzilikazi libaluleke kakhulu ngoba kuyabe kuthakazelelwa impilo yeNkosi yesizwe samaNdebele. Umkhosi wokukhumbula iNkosi wasungulwa ngo 2000 yiMMCA isebenzelana lenduna zomdabu, ezinye inhlanganiso zamasiko lemuli yakoKhumalo.
Lonyaka uzananzwa amalanga amabili. Ngelakuqala, mhlaka 5 Mpandula kuzaqhutshwa izifundo kuphakanyiswe amasiko lendimi, kuhloswe abantwana besikolo kusukela ku-ECD A kusiya emakolitshini.
Uthe mhlaka 6 Mpandula kuzakuba lodwendwe kusukela eMatshobana emgwaqweni kaLuveve Road, lapho abantu abazabuthana khona, andubana bahambe ngenyawo beqonde eCity Hall.
Izimota zokuhambisa abantu eKing Mzilikazi Memorial Site, eMhlahlandlela, zizabe ziseCity Hall. Inkundla le ingamakhilomitha angu-22 nxa usuka koBulawayo ngo-Old Gwanda Road.
