Online Reporter
Ethel Ncube
KULEXHEGU leKensington koBulawayo eliganyulwe ngelinye inina elingalaziyo ngemva kokuba licelwe ucansi linina leli lala okubangele ukuthi inina leli lilihlahlele ngehloka.
Ixhegu leli elileminyaka engu-85 esingeke siliqambe ngebizo kubikwa lavakatshelwa linina leli lapho elihlala khona. Kubikwa ukhulu wala okwenza inina lakhona lacunuka andubana lidobhe ihloka ligamule ixhegu entanyeni.
Intatheli ixhumane lesinye isakhamuzi esingathandanga ukuveza igama laso esibike ukuba ukhulu lo walandwa linina angalaziyo kodwa uthi inina leli lafika lathi lifuna ucansi.
“Ngenva kokucela ucansi kubikwa ukhulu wathi yena ngeke enze into enjalo okwenza inina leli lacaphuka lahle ladobha ihloka lalithela entanyeni kakhulu andubana lidliwe ngumswenya.
“Abantu kodwa balokhe bekhuluma ngalindaba esigabeni, abanye bathi mhlawumbe ukhulu uyalazi inina leli.
“Abanye bathi mhlawumbe ukhulu lenina leli bayazana, bebelobudlelwano mhlawumbe kwasokusiba lokungezwani okubangele ukuthi ukhulu bamhlahlele ngehloka. Bathi kumbe ukhulu kafuni umuntu lo abotshwe nje,” kutsho lesisakhamuzi esale ukuqanjwa ngebizo.
Uthe abantu balinde ukuba ukhulu asile abuzisiswe kuhle aqambe ukuthi ngubani owamenza isihluku lesi. Nxa eqina ngokuthi kamazi kungcono simbhadalele enyangeni kumbe kubaphurofethi umama owamgamulayo avele.
“Indaba yakhe ikabili, engabe engamazi umuntu amgamulayo kumbe efihla engafuni ukubophisa umama wakhona iqiniso nguye olaziyo ukhulu kodwa umama lo kumele abanjwe lehloka kumele liyesentshenzwa siqede ngendaba le,” kubika isakhamuzi lesi.
Ukhulu wabizelwa i-ambulensi eyiyo eyamthwalela esibhedlela.
Intatheli ixhumane lesikhulumi samapholisa koBulawayo uInspector Nomalanga Msebele obike ukuba indaba enjalo isezandleni zamapholisa.
“Sicela uzulu asincedise ukuba sithole inina leli eligamule ukhulu ngoba eyale ukwenza ucansi lalo lamgamula labaleka. “Okunye njalo sithanda ukukhuthaza uzulu ukuthi atshiyane lomkhuba wokulwa nxa kuthe kwaba lengxaki abantu abalungise okuhluphayo ngokuthula hatshi ukulwa,” kubika uInsp Msebele.
