Online Reporter
Ethel Ncube
KUDUTSHULWE imota kasiphatheleni koBulawayo kwenye yendawo zokudlela ngempelaviki, wathathelwa imali ngesikhathi elungela ukusuka lapho akade ethenga khona ukudla.
Umamangala ongusiphatheleni koBulawayo wayephiwe imali ngesikhathi eseTredgold ngomunye abasebenza bonke kubhizimusi labo, uthe eqeda lapho waqonda kwenye indawo ethengisa ukudla esiyathenga kanti usezathathelwa imali.
Kubikwa ukuba umamangala uAleck Chigwere, uthe eqeda ayekwenza lapho okudlelwa khona wangena emoteni yakhe, elungela ukusuka kwavela enye indoda yazama ukuvula isivalo semota yakhe yehluleka ngoba kukhiyiwe.
Uthe ezama ukubuyela emuva ngemota umetheswacala wahle wadubula i-windscreen yemota yahle yafa.
Umamangala esesabela impilo wahle wehla emoteni wayacatsha esitolo esiseduze. Omsolwa bahle bavula imota bathatha isikhwama esasileUS$ 4000 leR60 000 bahle badla phansi lemali, akula osebanjiwe.
Ometheswacala laba babehamba bebathathu ngesikhathi kudutshulwa imota bezama ukuthatha imali, bathi beqeda ukuthatha imali bangena emoteni yabo yahle yadla phansi.
Intatheli ixhumane lesikhulumi samapholisa koBulawayo u-Inspector Nomalanga Msebele obike ukuba indaba enjalo isezandleni zamapholisa.
“Sikhuthaza uzulu ukuthi angathwali imali enengi ngoba lokho kudala ukuba alandelwe ngamasela. Sicela uzulu ongabe elolwazi ngometheswacala laba asithinte kumbe athinte amapholisa aseduzane laye.
derick.khumalo