admin
Samkelo Tshuma
UMCULI kamaskandi wakuleli olodumo kodwa ohlala kweleSouth Africa, uMxolisi Mvundla odume ngelithi uZinjaziyamluma usepheke idlalade elitsha aliphakululele abalandeli bakhe ngempelaviki eNational Art Gallery koBulawayo. Idlalade lakhe leli elitsha lithi-competition of jealous.
Intatheli ixhumane loZinjaziyamluma ecingweni waveza ukuthi wakhetha ukubiza idlalade lakhe ngalindlela ngoba kulabantu abanengi abamenzela umona.
“Kayisuye wonke umuntu ochelesayo nxa ngiphumelela kungakho abanye bacina bengenzela umona yikho nje ngabona kufanele ukubiza idlalade lami ngalindlela,” kutsho uZinjaziyamluma.
Uthe okumenza aqhubeke ephekela abalandeli bakhe uluju lwendlebe yikuthi uthola usekelo olunengi kibo.
Uqhubekele phambili waveza ukuthi okumenze wazophakululela idlalade lakhe koBulawayo yikuthi abalandeli bakhe bakuleli bebemsola ngokuthi uhlala esenzela yonke imicimbi kwele-South Africa.
UZinjaziyamluma usekhiphe amadlalade amane kunye levidiyo eyodwa.
Online Reporter