IYESABA IDEMBARE! ‘. . . I-BF igcwele udlame’

Nkosilathi Sibanda
U-EDMORE Muzanenhamo uyabe engekho kumdlalo weHighlanders leDynamos ngeSonto, lokhu kulakho ukwehlisa uvalo oluphethe abafana beMbare phambili kwalumdlalo.

UMuzanenhamo nguye lo owahlohla ibhola elayalwa ngonompembe uNorman Matemera loBongani Gadzikwa mhla amathimu la ediibana enkundleni yeRufaro kumaviki amabili adluleyo.

Umdlalo wakuqala waphela iBosso iqilwe 3-2.

UMuzanenhamo, odume ngelithi ‘Digo’ kunguqu ungomunye wabadlali bamathimu akuPSL abamiswe ukudlala ngenxa yokuthola ama-yellow card amathathu.

NgeSonto iBosso inxusa iDeMbare eMagumeni lapho okukhangelelwe ukuthi kukhuze unompembe ozabe eqoqekile.

Lanxa kusele amalanga ambalwa nje ukuthi zingqikilane eMagumeni, iDynamos isiveze ukuthi ilamagwala phakathi kwayo nanko phela inkokheli zayo ziphikelela ngokuthi zifuna kulinde amapholisa amanengi ngeSonto.

Kuqala ngoMgcinisihlalo uKenny Mubaiwa obike ukuba kasoke avumele ukuthi iqembu lakhe lilugxobe eMagumeni ngoba esesaba udlame olungaba khona kulumdlalo.

UMubaiwa ufuna ukukholwa ngokuphezulu ukuthi amapholisa esizwe iZRP azavimba ngobunengi bawo.

Umkhokheli lo uthe abadlali bakhe labalandeli babo basengozini yokutshaywa.

NgoLwesibili uMubaiwa ukhulume emphakathini wathi: “Iqiniso elikhona yikuthi siyesaba ukuyadlala eBarbourfields. Kulodlame olunengi obelumemetheka lapho kuminyaka edluleyo.

“Sizahlala phansi njengequla le-executive sibone ukuthi siluphathe njani loludaba.”

UMubaiwa uthe labadlali babo basevalweni njalo abenelisi ukulungiselela kuhle umdlalo abakhangelane lawo.

“Kunzima ukulungiselela umdlalo lo ngapha sicabanga ngokuthi sizadlalela eBarbourfields.

“Okusihluphayo yikuthi sibona angathi asivikelwa okupheleleyo nxa siseBarbourfields. Kungcono sinikeze iHighlanders imiklomelo yonke.”

Kusenjalo, inhlanganiso yePremier Soccer League isikhiphe umbiko wokuthi kulabadlali abayisikhombisa abangasoke badlale kulimpelaviki.

Abanye abadlali babalisa uDexter Phiri (ZPC Kariba FC), Blessing Dzumbunu (Dongo Sawmill FC), Gilbert Zulu (Hwange FC), Edmore Muzanenhamo (Highlanders FC), Lawrence Mhlanga (Chicken Inn FC), Edmore Chirambadare (Chicken Inn FC), lo Brighton Chandisaita (Flame Lily FC).