Online Reporter
YiNtatheli kaMthunywa
UMKHOSI we-Ntwasa Arts Festival koBulawayo uqale ngoLwesibili njalo ukhangelelwe ukugqitshwa ngoMgqibelo mhlaka 27 Mpandula.
Umkhosi weNtwasa ubuyele kusigaba sentwasa lapho owandise ukuqhutshwa ngaso kulandela ukuba uqhutshwe ngenyanga kaLwezi nyakenye. Umkhosi walonyaka uqhutshwa ngaphansi kwendikimba ethi: “Imagine It, Experience It.”
Loba bebhekana lenhlupho zezimali kanye lezokulungiselela, umqondisi womkhosi lo, u-Raisedon Baya uthe zonke izinhlelo zihamba kuhle.
“Umkhosi walonyaka kungenzeka ungabi mkhulu ngendlela ebesifisa ngayo, kodwa senze konke okusemandleni ethu ukuze uphumelele. Sihlele imcimbi ebalulekileyo ecitshe ibe yisithupha noma eyisikhombisa abantu abangayilindela ngesikhathi somkhosi,” kutsho uBaya.
Umkhosi lo uvulwe ngoLwesithathu ebusuku lapho iBoys 2 Men: yabafana abakhulele koBulawayo abanandise eBulawayo Public Library, okugoqela osomahlaya abasakhulayo, uMbongeni Ignatius loFrank Chirisa.
NgoMgqibelo kukhangelelwe ukuba kubemnandi ku Ipi Ntombi eBulawayo Theatre.
Umcimbi omkhulu womkhosi lo uthi, “Women, Wine and Words,” ubuya ngamaphimbo abesifazane abahlanganisa uTina Watyoka, Um’Africakazi, Vuyo Brown, Rute Mbangwa, Lioness Shumbakadzi kanye loSithandazile Gumbo. Lonyaka, ibambisene lomhlangano wokuqala weGender at Work, oqoqwe ngokubambisana leZimbabwe Musicians’ union (ZiMU) kusasa eBulawayo Club.
NgoLwesihlanu kuzahlonitshwa isazi sembali umuyi uPathisa Nyathi, lapho enye ingcitshi kwezembali uArnold Nkala, azakwethula isifundo ngendima yemikhosi kanye lezigaba zomnyaka emphakathini walamuhla.
“Lesi sifundo akusona ngempela esimayelana ngoBab’ uPathisa, kodwa ngumhlobo womsebenzi ayewuqakathekisa. Sikhuthaza uzulu ukuba labo abakholwa kulokho ayekumela ukuthi babuye kumcimbi lo.
UBaya uphethe ngokucela usizo kulabo abangancedisa ukuba umkhosi lo ube ngophezulu.
“Silokhu sikudinga ukusekelwa ngemali lokunye ukuze umkhosi weNtwasa ubelomfutho omkhulu. Sikhuthaza njalo abantu bakoBulawayo ukuba babuye bazophatheka bazincindele ukudla kwamehlo.”
derick.khumalo