Online Reporter
YiNtatheli kaMthunywa
ABE-ZIMBABWE Prisons and Correctional Services (ZPCS), sebebike ukuba izibotshwa sezizanikezwa ilungelo lokuhlangana emacansini lezithandani ngesikhathi zivalelwe ejele, njenge ngxenye yohlelo lokuvuselela impilo yazo.
Uhlelo lolu seluqalisiwe eMarondera Female Open Prison kunye laseConnemara Prison, lapho ezinye izibotshwa esezithola ithuba lokuya emacansini.
Lokhu kwenziwa emizini yazo, hatshi phakathi kwejele, ngokutsho kweZPCS.
I-ZPCS ithe lolu hlelo luyingxenye yemizamo yokutshintsha indlela yokujezisa izibotshwa ukuze kugxilwe kakhulu ekulungiseni lasekuguquleni impilo yomuntu, hatshi ukumjezisa nje kuphela.
Izibotshwa ezivunyelwa ukuthola leli ilungelo ngezitshengise ukuziphatha kuhle, ukuzimisela lokwamukela izifundo zokulungiswa.
Isikhulumi se-ZPCS, u-Assistant Commissioner Meya Khanyezi, uthe lolu hlelo luzaqhubekela phambili njengengxenye ye-parole system ezayo.
“Uhlelo lwe-parole oluzayo luzaphinda lubambe lendaba yamalungelo okuhlangana,” kutsho uKhanyezi.
“Izibotshwa eziseMarondera Female leConnemara sezilelungelo lokuthi zihlale emakhaya azo ukuze zihlangane lezithandani,” kutsho uKhanyezi.
UKhanyezi ukhuthaze imuli labantu emphakathini ukuthi babe yingxenye yohlelo lokuguqula izibotshwa.
“Thina njengeZPCS asisoze sikwazi ukulungisa umuntu sodwa. Imuli lomphakathi yibo okumele babe lendima enkulu, ngoba izibotshwa ziphuma emphakathini njalo zibuyela khona.”
Wengeze ngokukhuthaza uzulu ukuthi avakatshele emajele, alethe izipho njalo aveze uthando kuzibotshwa njengendlela yokuzikhuthaza ukuthi zibuyele empilweni eqondileyo.
