Online Reporter
Brandon Moyo
INHHLANGANISO yeJesus Behind Bars Initiative, ibambene lebandla leSeventh-day Adventist, izimisele ukuguqula impilo zezibotshwa ezidlala inguqu, ukwenzela ukuba mhla ziphuma emajele, zibe ziqoqekile, zilungele ukuqhubeka kwezemidlalo.
Kulamalanga ambalwa adluleyo, kwenziwe umqhudelwano wamaqembu ezibotshwa eKhami Prison lapho okuncintise khona amathimu alitshumi lambili. Inhloso yemidlalo le bekuyikuncedisa izibotshwa ukuthi zikhulule ingqondo, zithole ukwelatshwa komoya lokulungiselela ikusasa yazo. Amaqembu la yiDynamos, Orlando Pirates, Bulawayo Chiefs, Masvingo United, Ihlosi Academy, Jaunda FC, Sundowns, Chicken Inn, Manchester City, Highlanders, Kaizer Chiefs leCAPS United.
Izibotshwa ezidlala inguqu, eziphatheke kulumncintiswano, zibike ngokujabula ukuphiwa ithuba lokutshengisa ithalenta lazo. Zibonge zingaqedi ngosekelo oluvela kugatsha lweZimbabwe Prisons and Correctional Services (ZPCS).
Omunye wezibotshwa lezi uSamuel Moyo, oyisibotshwa eKhami Remand Prison, utshele iZimpapers Sports Hub ukuthi usethole insindiso.
“Ngikhuluma ngimele ezinye izibotshwa, ngithanda ukwethula isibongo sethu kubonogada beZimbabwe Prisons and Correctional Services ngokusincedisa entweni ezinengi silapha ejele. Basincedise ukuthi siphatheke kulumncintiswano wenguqu. Bekukuhle njalo siyajabula.
“Sibonga ibandla leSeventh-day Adventist leJesus Behind Bars lemuli yakoNkomo ngosizo lwabo. Mina sengithole insindiso,” nguMoyo lo.
Uthe njengezibotshwa, isicelo sabo emphakathini yikuthi kube lenhlanganiso ezinengi ezibasekelayo kwezemidlalo.
“Akumelanga kube ngumsebenzi weZPCS kuphela. Sicela labanye baze ngobunengi basixhase. Sidinga uncedo lwempahla ebalisa ama-kit, lama-boots. Sibonga ukuthi Jesus Behind Bars leSDA ziyazama ukukhokhela kulokhu.
Owasungula iJesus Behind Bars uDumisani Nkomo uthe ezemidlalo zibalulelike ekuguquleni impilo zezibotshwa.
“Sizama ukuncedisa izibotshwa ukuthi zithole ukusindiswa, ziguqule impilo yazo kwelingcono, andubana ziphume ejele. Siyabakhulekela, sibaphathise ukuxazulula inkinga abalazo.
“Siqhube umncintiswano ngaphansi kwendikimba ethi ‘wonke umuntu ngumdlali’, okutsho ukuba akusimlandu kaHulumende yedwa ukuncedisa izibotshwa. Singahlangana njengomphakathi singenza okunengi.” Umncintiswano unqotshwe yiDynamos, inqoba iPirates nge 7-6 ngemva kwembekwa.
