Online Reporter
Ugwalo: Emfuleni Wezinyembezi olwalotshwa ngu- Ezekiel S K Hleza
Ophezulu Stinta
Siqhubeka ngogwalo lwethu lwezinyembezi lapho umlobi esiqhuba ngohambo lwempi yenkululeko, uhambo olubalazwe ngegazi, izinyembezi kanye lenhliziyo eyopha igazi.
Sinanzelela ukuthi uhambo lolu aso hambo lwamavila luhambo lwamaqhawe, olungafuni bathengisi, olungafuni labo abangela zifuba kanye labo thatha wese njengoba sibona indlela abafa ngayo laba abangela mandla okumelana lomumo wempi.
Yisifundo esikhulu kakhulu emphakathini ukuthi lapho sekungani umhlaba awuselamehlo ngenxa yokuthi amehlo wonke asethe nhlo ekudumeni kwezigwagwagwa, kuqakathekile ukuthi abantu baqhubeke belokhu bengabantu bephethwe yibuntu kungabahlubuki ngoba imvelo ilendlela yayo yokukhuza kanye lokujezisa.
Kuyinduduzo enkulu okwamagama ukuthi ngesikhathi kuqothuka umhlaba, izakhamuzi zaseMapate ngobunengi bazo zazinakekelwa, sibona nje ziqonqoselwa ngabafana bempi ngelithi bangalugxobi emizini yabo iviki yonke, ngoba babesazi mhlophe ukuthi umumo wawumubi.
Kungumbuzo onzima mpela ukuthi pho kwakuphilwa ngani njani ehlathini lapha kodwa babephila abantu beyizidalwa zikaMlimu. Siyabona ke kusahluko setshumi lantathu izakhamizi sezibuyela emizini yazo ngemva kwensuku ababezitsheliwe.
Lapho bebuyela bathola imizi yabo itshile, izifuyo ezinye zilimele ezinye zitshile kungaso mumo ojabulisayo kumbe onika ukuthula.
Impi iyayiqeda inotho yabantu kungene ubuyanga emizini kungela ndlela elula engavela ngokuphazima kwelihlo ukuhlangula izakhamizi phakathi kohlupho lwabo. Ngezinye zohlupho kanye lobunzima esihlangana labo obudalwa yimpi, ikakhulu sikhangela ukuhlala kwezakhamizi ezile mpilo yazo egxile ekufuyeni.
Ngemva kwalesi sivuvu kwasekungathi kuthe cosololo, umbhobho ungasakhali njengensuku zonke suzwakala nje lapha lalaphaya amajaha esebonakala ehamba ngababili ngabathathu bechelesile, kusobala kwasekulo mehluko okuyisibonakaliso njalo ukuthi umumo wawusisiya ekuthuleni.
Kuhlangothi lwamabhunu kwasekunzima ngempela ngoba babengasenelisi khona nje lokuhamba ngenyawo njengoba amajaha ayehlanyele omaquphula babhada ngawo indawo yonke, kwakubiyiwe mpela kungafuneki ngitsho uzwane lwesitha oluqumayo.
