Vusumuzi Dube
Lovemore Dube
ONGUMQEQETSHI wabasakhulayo kumdlalo wekhilikithi uPollock Mubobo uthe ilizwe lingaya kude nxa kungaba labanengi abasemalokitshini, abawudlalayo.
UMubobo ukhulume amazwi la ngoLwesibili encoma umsebenzi owenziwa yi-Old Mutual lebhanga leCABS emalokitshini akoBulawayo laseVictoria Falls.
Uthe kuyajabulisa ukuthi imisebenzi yamankampani womabili ifinyelela kubadlali abasilela okuthile emdlalweni njalo okuhle yikuthi umdlalo uhanjiswa emalokitshini. Ngenyathelo leli, uthe abasakhulayo abanengi bazafundiswa lumdlalo.
Usekelo lolu solubone amaqembu afika phose amatshumi amane abafana lamankazana belolongwa yi-Old Mutual Cricket Excellence Centre leBulawayo Metropolitan Cricket Board.
Umdlalo usuyehluleke ukuphakama ngoba ubudlalwa ngabalutshwane.
“Kwakuhle ukuthi uhlelo lokuthuthukisa umdlalo lwenziwa lapho okuhlala khona abantu abanengi. Abasakhulayo yibo abalithemba lakusasa. Bazakhula bebambe okuyikho kusukela phansi kumdlalo lo,” kutsho uMubobo.
Onguye oqoqa imidlalo le njalo eyisungule phose iminyaka efika itshumi, uJoseph Rego uthe uyajabula ukuthi balokhe belobungane le-Old Mutual leCABS. Uthe kuhle ngoba lokhu sokuphathise ukuthi ikhilikithi yaziwe, isabalaliswe emphakathini.
Kusenjalo, mhlaka 2 Ncwabakazi, kubikwa kuzaqhutshwa umncintiswano wokugqiba uhlelo lwemidlalo yabantwana abaleminyaka yokuzalwa engaphansi kwetshumi lantathu e-Old Mutual Cricket Excellence Centre.
Online Reporter