Online Reporter
Zimpapers Sports Hub
IZIMBABWE Football Association (Zifa) isiqalise uhlelo lokulungisa kakutsha ama-academy ebhola likanobhutshuzwayo elizweni lonke ngenhloso yokuqinisa ukuthuthukiswa kwabatsha lokwakha indlela ecacileyo yokukhulisa ithalenta.
Umsekeli kamongameli weZifa, uKennedy Ndebele, uveze lokhu ngesikhathi somhlangano wamaqembu amatsha kuSouthern Region, lapho agcizelele khona ukuthi sekulendingeko yokulungisa ukungahleleki okukhona kubhola labasakhulayo.
“Siphakathi kohlelo lokuhlela kakutsha ibhola labatsha elizweni lonke. Kube lokungahambelani ekuthuthukiseni abadlali, ngakho sifuna wonke amaqembu alandele uhlelo olulodwa ngaphansi kweZifa.”
Uhlelo lolu lukhangelelwe ukwehlukanisa phakathi kwama-academy eqiniso lamaqembu ebhola labantwana adlala nje okokuzilibazisa, kubekwe imithetho ecacileyo yokusebenza, imiqhudelwano lokubhaliswa. Ama-academy azalandela izinga eliphezulu, kuthi ama-youth clubs abhadale imali engange-US$200 ngomnyaka ukuze angenele imiqhudelwano yezigaba.
Lokhu kuza ngesikhathi ama-academy afana leYoung Flying Stars ekoBulawayo eqhubeka ekhupha ithalenta elitsha, enikeza abatsha amathuba okudlulela kumazinga aphezulu ebhola. Umqondisi wale i-academy, uColleen Nyambiya, uthe baqalisa ukuqeqetsha abantwana besebancane ukuze bakhule belolwazi oluqinileyo.
“Sithatha abantwana kusukela beleminyaka emihlanu yokuzalwa, sibancedisa ukuthi baphumelele ebholeni.”
I-Zifa iphinde yaqinisa ukwethulwa kwezifundo zeCaf D, ngenhloso yokuphakamisa izinga lokuqeqetsha ebholeni labatsha.
Kusenjalo, iZimbabwe izakwamukela umqhudelwano weCaf African Schools Championship kusukela mhlaka 2 kusiya ku-10 kuMbimbitho eHarare, okutshengisa ukuzimisela kwelizwe ekuthuthukiseni ibhola.
Kulindeleke ukuthi uhlelo lokulungisa kakutsha ama-academy luthuthukise ibhola labatsha, lunikeze indlela ecacileyo yokukhulisa abadlali, njalo luqinise ikusasa lomdlalo eZimbabwe.
