Online Reporter
Zimpapers Sports Hub
IQEMBU leDynamos selimise umsebenzi umqeqetshi walo omkhulu, uGenesis Mangombe, kulandela uphenyo oluqhutshwayo ngensolo ezethulwe ngabadlali kanye lamanye amalunga ekhomithi ephethe iqembu.
Kuncwadi yokumisa umsebenzi ebonwe yiZimpapers Sports Hub, ibhodi yeDynamos ivumelane ukukhulula uMangombe emsebenzini wakhe okwesikhatshana ukuze uphenyo luqhubeke kungela kuphazanyiswa.
Phakathi kwezinsolo eziqondiswe kuye kulokungalandeli iziqondiso zenkokheli zeqembu lokuthi kusolwa ukuba abanye abadlali babebanjwa ngamandla ukuthi bageze ngemithi, ngaphambi kokudlala.
Ukumiswa kukaMangombe kuza ngemva kwezinyanga ezimbalwa ebuyiselwe eqenjini ekuqaleni kwesizini.
Ikusasa lakhe kuDynamos alisacaci, ikakhulu njengoba esanda kuthinteka futhi kundaba zokubuyela kuTriangle United.
Kusenjalo, iDynamos kubikwa isiseduze lokuqhatsha umqeqetshi omutsha odabuka eSerbia ukuze athathe intambo zokukhokhela iqembu.
Kubikwa ukuthi umqeqetshi lo usefikile kuleli njalo ubonwe ngeSonto enkundleni yeBarbourfields lapho abukele khona umdlalo weCastle Lager Premier Soccer League phakathi kweDynamos leHighlanders.
Abafakazi abaseduzane lodaba baveze ukuthi umqeqetshi lo uhlala eMunhumutapa Hotel njalo kulindwe ukuthi ahlangane labadlali phakathi kweviki le, ngaphambi kokwethulwa kwakhe ngokusemthethweni.
